BQO-da ádep kodeksi talaptaryn buzǵan prokýratýra qyzmetkeri jaýapkershilikke tartyldy

<p>ORAL. KAZINFORM &mdash; BQO prokýrory Serik Shalabaevtyń buıryǵymen Tasqala aýdany prokýratýrasynyń qyzmetkeri Qaıyrbek Temirbaı qatań sógis túrindegi tártiptik jaýapkershilikke tartyldy.</p>

BQO qoǵamdyq keńesiniń múshesi, «Ádildik joly» RQB ókili Baýyrjan Ahmetjannyń Feısbýktegi áleýmettik paraqshasynda málim etkenindeı, atalmysh qyzmetker QR quqyq qorǵaý organdary, azamattyq qorǵaý organdary jáne memlekettik feldegerlik qyzmeti qyzmetkerleriniń ádep kodeksi talaptarynyń buzylýyna jol bergen. 

B.Ahmetjannyń málimdeýinshe, Tasqala aýdany prokýratýrasynyń prokýrory Q.Temirbaı bıyl kóktemde aýrýhanaǵa kelip, polıtsııaǵa ustalǵan dosy Abat Súleımanovqa qatysty hattamany toltyrma dep suraǵan. 

«Tasqala aýdandyq sotynyń sýdıasy Talap Maqıshev 24 sáýirdegi qaýlysymen A.Súleımanovqa qatysty QR Ákimshilik quqyq buzýshylyq kodeksi 608-baby 1-tarmaǵyna (júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy) sáıkes qozǵalǵan ákimshilik quqyq buzýshylyq týraly isti qysqartqan. Sotta polıtsııa bóliminiń bastyǵy Azamat Qalıev aýrýhanada bolǵanda, oǵan prokýror Qaıyrbek Temirbaı jolyǵyp, Abat Súleımanovty medıtsınalyq kýálandyrýdan ótkizbeýdi suraǵanyn aıtqan. Dál osyndaı zańsyz usynys alǵany týraly sotta avtoınspektor A.Muqashev jetkizgen. Sýdıa prokýror Qaıyrbek Temirbaıdyń is-áreketinde sybaılas jemqorlyq táýekeli bar ekendigi týraly jeke uıǵarym shyǵarǵan», - deıdi B.Ahmetjan.

Alaıda prokýror ótinishhat, aýdandyq aýrýhana dırektory R.Bralov shaǵym keltirgennen keıin oblystyq sottyń sýdıasy Gúlnara Mınıýs 20 mamyrdaǵy qaýlysymen aǵa prokýror Qaıyrbek Temirbaıǵa qatysty shara qoldaný týraly jeke uıǵarymnyń kúshin joıǵan. 

BQO prokýrorynyń orynbasary Azamat Sátbaev B.Ahmetjanǵa bergen 18 shilde kúngi jaýabynda júrgizilgen qyzmettik tergeý barysynda Q.Temirbaıdyń A.Súleımanovtyń múddesine ákimshilik iske tikeleı aralasqany týraly ýájder obektıvti turǵyda dáleldenbegenin kórsetken. Degenmen Q.Temirbaıdyń prokýratýra qyzmetkeriniń abyroıy men joǵary ataǵyna nuqsan keltirýi múmkin minez-qulyq pen qatynasqa, jurtshylyq tarapynan aıtylatyn synǵa, qoǵam tarapynan óziniń is-áreketine shaǵymnyń týyndaýyna jol bergeni úshin oblys prokýrorynyń buıryǵymen tártiptik jaýapkershilikke tartylǵany jazylǵan.

BQO prokýratýrasynyń baspasóz qyzmeti Baýyrjan Ahmetjanǵa osyndaı resmı jaýaptyń berilgenin rastady.