BQO-da adamnyń bas súıegi men kóne qarý-jaraq tabyldy

ORAL. QazAqparat – 11 mamyr kúni Batys Qazaqstan oblysy Syrym aýdany Alǵabas aýylynyń turǵyny Talǵat Jumazov úıiniń aýlasynda jer qazyp júrip, adamnyń bas súıegin, qylysh pen bes jebeniń ushyn taýyp alǵan, dep habarlaıdy QazAqparat tilshisi.

Qylyshty tot bassa, jebeniń ushtary kógergen.

Aýdan ákiminiń orynbasary Aslanbek Sarqulovtyń aıtýynsha, adamnyń bas súıegi men jádigerlerdiń qaı ǵasyrǵa jatatynyn anyqtaý maqsatynda oblystyq tarıh jáne arheologııa ortalyǵynan mamandar shaqyrtyldy.

«Syrym aýdanynda tarıhı oryndar barshylyq. Sonyń ishinde el bastaǵan kósem, qol bastaǵan batyr Syrym Datuly tý ilip, qaraýyl qoıǵan áıgili «Syrym shyqqan tóbe» Alǵabas aýylynan alys emes. Sondaı-aq Jumaǵazy qaziret – «Dádem ata» kesheninde Ersary Ańqaty ózeniniń jaǵasynda Syrymnyń atalas aǵaıyny Ersary batyr Beketaıuly da jerlengen. Bul osy mańda talaı urystyń ótkenin aıǵaqtaıdy. Sonymen birge qylysh pen jebe ushynyń odan da kóne dáýirge tıesili bolýy ǵajap emes. Ony aıqyndaý arheolog ǵalymdardyń enshisinde», - dedi QazAqparat tilshisine A.Sarqulov.