BQO-da 911 myń gektar aýyl sharýashylyǵy jeriniń paıdalanylmaı otyrǵany anyqtaldy
BQO jer qatynastary basqarmasynyń basshysy Murat Ómirálıevtiń óńirlik kommýnıkatsııalar qyzmeti alańynda ótken brıfıngide málim etkenindeı, sonyń ishinde bıyl 641 myń gektar jerdiń ıgerilmegeni belgili boldy.
Aýdandar boıynsha Tasqalada 180 myń, Syrymda 170 myń, Aqjaıyqta 130 myń gektar jer paıdalanylmaı, bos jatqan.
Búginge deıin jerdi paıdalanýshylar 116 myń gektar jerdi óz erkimen memleket menshigine qaıtardy. Sonyń ishinde 43 myń gektary aýyl sharýashylyǵy aınalymyna qaıta engizildi.
M.Ómirálıevtiń sózine qaraǵanda, jergilikti atqarýshy organdar tarapynan júrgizilgen jumystardyń nátıjesinde jer paıdalanýshylar 465 myń gektardy ıgerýge kiristi.
Qazirgi ýaqytta qalǵan 330 myń gektar jerdi memleket menshigine qaıtarý baǵytynda sharalar atqarylýda. Atap aıtqanda, jer paıdalanýshylardyń árqaısysymen túsindirý jumystary júrgizilýde.
Aýyl sharýashylyǵy maqsatyndaǵy jerlerdiń tıimdi jáne utymdy paıdalanylýyn retteý maqsatynda oblys ákiminiń tóraǵalyq etýimen keńester ótkizilip, sonyń qorytyndysymen 340 myń ga jeri bar 177 jer paıdalanýshynyń esimderi jarııa etildi. Sonyń yqpalymen kúni búgin 70 myń gektar ıgerile bastaldy.
«Taǵy bir mańyzdy másele – jer telimderin tabystaý erekshe jaǵdaılardy qospaǵanda, saýda-sattyq (konkýrs, aýktsıon) arqyly júzege asyrylady. Ótken jyly 43 konkýrs ótkizilip, 391 myń gektardy quraıtyn 527 jer telimi ıesin tapty. Bıyl 45 konkýrs nátıjesinde 635 jer telimi (504 myń ga) tabystaldy. Jyl sońyna deıin jergilikti atqarýshy organdar 43 jer telimi (43 myń ga) boıynsha 6 konkýrsty ótkizbekshi», dedi Murat Amangeldiuly.
Eske sala keteıik, budan buryn Batys Qazaqstanda 100 myńnan astam adamnyń jer kezeginde turǵanyn jazǵan bolatynbyz.