BQO-da 900-ge jýyq adam raqymshylyqqa iligýi múmkin

ORAL. QazAqparat - QR Táýelsizdiginiń 25 jyldyǵyna oraı Elbasy jarııalaǵan raqymshylyqqa baılanysty Batys Qazaqstan oblysynda 888 adamǵa keshirim jasalýy múmkin, dep habarlaıdy «QazAqparat» HAA tilshisi.

Oblys prokýrorynyń kómekshisi Ádil Aqmýldınniń aıtýynsha, sonyń 143-i bas bostandyǵynan aıyrý oryndarynda jazasyn ótep jatsa, 743-i probatsııalyq qyzmet baqylaýynda esepte turady.

Bul - elimiz táýelsizdik alǵannan keıingi kezeńdegi toǵyzynshy raqymshylyq sharasy. Onyń maqsaty burynǵydaı túrmede otyrǵandardyń sanyn azaıtý emes, Táýelsizdiktiń 25 jyldyǵyna oraı keshirim jasap, meıirimdilik kórsetý bolyp tabylady. Osy oraıda TMD elderi arasynda Qazaqstan raqymshylyq sharasyn az ótkizgenin aıta ketý kerek.

Birinshiden, raqymshylyqqa aýyr emes qylmys jasaǵandar iligedi. Olardyń ishinde áleýmettik turǵydan qıyn jaǵdaıdaǵylar bar. Bulardyń bári birdeı erkindikke shyqpaıdy, kópshiligine basqa jaza belgilenip, probatsııalyq qyzmettiń baqylaýynda bolady. Al aýyr jáne asa aýyr qylmys jasaǵandar úshin tek ótelmegen jaza merzimi qysqartylady. Mysaly, jasóspirimder, ekiqabat áıelder, kámeletke tolmaǵan nemese múgedek balalary barlar, jalǵyz ózi ata-ana bolyp tabylatyn er adamdar aýyr qylmysqa barǵan bolsa, jaza merziminiń teń jartysy, qylmysy asa aýyr bolsa, besten bir bóligi qysqartylady.

Sonymen qatar isi tergelip nemese sotta qaralyp jatqan adamdardyń qylmysy bolmashy bolsa, raqymshylyqqa iligýi múmkin.

Raqymshylyq asa qaýipti qylmys jasaǵandarǵa qoldanylmaıdy.

BQO prokýratýrasy túrmeden bosaǵandardyń árqaısysyna qalypty ómirge oralýy úshin ne isteýi, qaıda jolyǵýy, nendeı qujattar kerektigi naqty kórsetilgen jadynama beredi.