BQO-da 860 myń gektar aýyl sharýashylyǵy jeri bos jatyr
Oblys ákiminiń birinshi orynbasary Muhtar Mankeevtiń jıynda málim etkenindeı, sonyń 75,1 myń gektary memleket menshigine qaıtaryldy.
Osynyń ishinde 25,8 myń gektary jańa jer paıdalanýshylarǵa berildi. Sondaı-aq sharýalar 125,4 myń gektar jerdi ıgerýge kiristi. Al 659,8 myń gektar jerdi qaıtarý baǵytynda jumystar júrgizilýde.
«Qazirgi tańda QR Aýyl sharýashylyǵy mınıstrligi paıdalanylmaı jatqan jerlerge salyq salý mólsherin kezeń-kezeńmen kóterý, jer telimderin qaıtarmaýǵa bolatyn merzimdi qysqartý, ǵaryshtyq monıtorıngke kóshý boıynsha zańnamalarǵa tıisti ózgertýler engizý máselelerin qarastyrýda. Jańa zań jobasy kúshine ense, jerdi tıimdi paıdalaný baǵytyndaǵy jumystar jandana túsetin bolady. Oblysta aýyl sharýashylyǵy jeriniń jalpy kólemi 7 mln 040 myń gektar bolsa, sonyń 542 myńy – egistik, 5527 myńy – jaıylymdyq, 450 myńy – shabyndyq, 462 myńy – tyńaıǵan jerler. Degenmen 1991 jylǵy esepke qaraǵanda, óńirde 12,9 mln gektar aýyl sharýashylyǵy jeri bolǵan. Kóptegen jer teliminiń qorda turǵany anyqtaldy. Osy kórsetkishti qalpyna keltirý baǵytynda aýqymdy jumys júrgizilýde», dedi M.Mankeev.
Keńeste sonymen qatar 2019 jyldyń qyrkúıek jáne jeltoqsan aıynda óńir basshysy Ǵalı Esqalıevtiń tóraǵalyǵymen ótken jıyndarda aýyl sharýashylyǵy jerlerin qaıtarýǵa qatysty aýdan ákimderine berilgen tapsyrmalardyń birqatary oryndalmaǵany da aıtyldy.
Oblys prokýrorynyń aǵa kómekshisi Azamat Tileýbaevtyń sózine qaraǵanda, tek ótken jyldyń ózinde kadastrlyq quny 9 mlrd astam teńgeni quraıtyn jalpy kólemi 1130 myń gektar 2,5 myńnan astam jer teliminiń ıgerilmeı jatqany belgili boldy. Prokýrorlyq qadaǵalaý aktilerine sáıkes quny 700 mln astam teńgeni quraıtyn 108 myń gektar 221 jer telimi memleket menshigine qaıtaryldy. Quny 3,6 mlrd teńge 749 myń gektar jer (1153 telim) ıgerile bastaldy. Jer kodeksiniń 94-babyna sáıkes kadastrlyq quny 1,9 mlrd teńgege baǵalanǵan 67 myń gektardy quraıtyn 344 jer telimine qatysty uıǵarym qabyldanyp, aýyrtpalyq salyndy.
Bıylǵy birinshi toqsanda prokýratýra aktilerine sáıkes Bókeı ordasy, Bórli, Syrym, Tasqala jáne Báıterek aýdandarynda quny 80 mln teńgeden asatyn 18664 gektar jer qaıtaryldy.
Keńeste oblys ákimi Ǵalı Esqalıev aýyl sharýashylyǵy jerlerin tıimdi paıdalanbaı otyrǵan agroqurylymdar tizimin jarııa etý qajettigin, sonymen qatar jer telimin qosalqy jaldaýǵa berýdiń zańsyz ekendigin atap kórsetti.
«Keı sharýalar «Birlesken qyzmet týraly shart» jasaý arqyly qosalqy jaldaýǵa berip otyrǵan áreketin jasyrady. Tipti jalǵan shart jasasyp, jerin jalǵa berý esebinen paıda kórip otyrǵan iri sharýa qojalyǵy ıeleri de bar. Munyń bárin zań júzinde retteýge týra keledi. Al jerdi ıgerý barysynda qıyndyqqa tap bolǵan, aıtalyq, qural-jabdyǵy kemshin, sý kózinen tapshylyq kórip otyrǵan sharýalarǵa qoldaý kórsetiledi. Salyq ınspektsııasy mamandary jerdi tıimdi paıdalanbaı otyrǵan agroqurylymdarǵa on eselengen kólemde salyq salatyn bolady. Taıaýda «Geoaqparattandyrý» portaly iske qosylyp, agroqurylymdar jumysy spýtnık arqyly baqylanyp, kózboıaýshylyqqa barǵandar áreketi áshkerelenedi. Jıynda aıtylǵan usynys-tilekter jınaqtalyp, zańnamaǵa ózgerister engizý máselesi Úkimet nazaryna jetkiziletin bolady», dedi Ǵ.Esqalıev.