BQO-da 8 túrkııalyq azamat zańsyz «qonaqqa kelgen»
BQO polıtsııa departamentiniń baspasóz qyzmetinen málim etkenindeı, «Mıgrant» jedel aldyn alý is-sharasy barysynda Qazaqstan aýmaǵynda zańsyz júrgen Túrkııa azamattary ustaldy.
«22 aqpan kúni Aqsaı qalasyndaǵy jeke úılerdiń birinde tirkelmegen jáne vızasy joq 8 túrkııalyq azamat anyqtaldy. Sheteldikter muny ózderiniń burynǵy jerlesine qonaqqa kelgenimen túsindirdi. Olarǵa qatysty QR Ákimshilik quqyqbuzýshylyq týraly kodeksi 517-baby 4-bóligine (sheteldiktiń nemese azamattyǵy joq adamnyń Qazaqstan Respýblıkasynyń halyqtyń kóshi-qon salasyndaǵy zańnamasyn buzýy) sáıkes ákimshilik hattama toltyryldy. Bul bap boıynsha sheteldikterge 25 AEK kóleminde aıyppul salynýy nemese Qazaqstan aýmaǵynan shyǵarylýy múmkin. Sonymen qatar sheteldikterdi qabyldaǵan turǵynǵa qatysty 518-bap 2-bóligi (sheteldikter men azamattyǵy joq adamdardy qabyldaıtyn jeke nemese zańdy tulǵalardyń Qazaqstan Respýblıkasynyń halyqtyń kóshi-qony salasyndaǵy zańnamasyn buzýy) boıynsha ákimshilik materıal toltyryldy. Bul bap boıynsha sheteldikterdi qabyldaǵan turǵynǵa 25 AEK kóleminde aıyppul salynýy múmkin. Atalǵan materıaldar boıynsha sheshimdi Bórli aýdanynyń ákimshilik soty qabyldaıdy», dep habarlady vedomstvodan.
Eske sala keteıik, budan buryn Oralda Nıgerııanyń 2 azamaty ustalǵanyn jazǵan bolatynbyz.
Foto: BQO PD baspasóz qyhmeti