BQO-da 6 mlrd teńgege 4 sút-taýarly ferma salynady

ASTANA. QazAqparat – Batys Qazaqstan oblysynda 6 mlrd teńgege 4 sút-taýarly ferma salynady. Bul týraly Ortalyq kommýnıkatsııalar qyzmetinde ótken baspasóz máslıhatynda Batys Qazaqstan oblysynyń ákimi Narıman Tóreǵalıev aıtty, dep habarlaıdy QazAqparat tilshisi.

«Óńirde ımportqa táýeldilikti tómendetý, tamaq ónimderi óndirisin damytý jáne oblys halqyn azyq-túlikpen qamtamasyz etý maqsatynda birqatar jumysty qolǵa alyp jatyrmyz. 2023 jyly óńirlik agroqurylymdar men kásip ıelerine 16 mlrdqa jýyq sýbsıdııa jáne 15 mlrd teńge nesıe berý qarastyrylǵan. Bul jergilikti sharýalarǵa memleket tarapynan úlken qoldaý jáne zor múmkindik. Sondaı-aq, óńir halqyn sút ónimderimen qamtý baǵytynda «Agroónerkásip keshendegi ınvestıtsııalyq jobalardy qarjylandyrý» baǵdarlamasy aıasynda 6 mlrd teńgege iri 4 sút-taýarly fermasyn salý josparlanyp otyr 2 paıyzben nesıe beretin bolamyz. Jańa sút-taýarly fermalaryn ashqan jaǵdaıda oblys halqyn sút ónimderimen qamtamasyz etý 22 paıyzdan 32 paıyzǵa artatyn bolady», - dedi óńir basshysy.

Onyń dereginshe, «Jasyl beldeý» baǵdarlamasy aıasynda 2025 jylǵa deıin sýarmaly jerlerdi 9,6 myń gektardan 15 myń gektarǵa deıin ulǵaıttylady.

«Búginde kartop ónimimen qamtamasyz etý 91, pııazben 98, sábizben jáne qyryqqabatpen 56 paıyzdy qurap otyr. Osy baǵyttaǵy jumysty kúsheıtetin bolamyz. Atalǵan ónimdermen óz-ózimizdi qamtý úshin jyl sońyna deıin jalpy somasy 3 mlrd teńgeni quraıtyn syıymdylyǵy 12 myń tonna bolatyn eki iri ınvestıtsııalyq joba («júzege asyrylady», - dedi ol.

Oblys basshysynyń atap ótýinshe, 2025 jylǵa deıin qazirgi talaptarǵa saı 48 kókónis qoımasy jumys isteıtin bolady. Olardyń jalpy syıymdylyǵy 100 myń tonnadan asady.

«Osylaısha, atalǵan ónimdermen óz-ózimizdi tolyq qamtıtyn bolamyz», - dedi Narıman Tóreǵalıev.