BQO-da 541 mln teńgeden astam zalal keltirgen qarjy pıramıdasy boıynsha tergeý júrip jatyr

ORAL. QazAqparat – Batys Qazaqstan oblysynda jeke adamdarǵa 541 mln teńgeden astam zalal keltirgen qarjy pıramıdasy boıynsha tergeý júrgizilip jatyr, dep habarlaıdy QazAqparat tilshisi.

BQO boıynsha ekonomıkalyq tergeý departamentiniń baspasóz qyzmetinen málim etkenindeı, «Chia Tai Pharmaceutical» kompanııasy ózin ınvestıtsııa tartýshy mekeme retinde kórsetip, joǵary jáne turaqty tabyspen qamtamasyz etemiz dep ýáde etken.

«Chia Tai Pharmaceutical» jeke adamdardan qarjy tartyp, ony qatysýshylar arasynda qaıta bólip otyrǵan. Bul rette qarjyny kásipkerlik qyzmetke paıdalanbaǵan. Keltirilgen zalal kólemi 541 mln teńgeden asty. Qazirgi tańda osy is boıynsha keshendi sharalar júrgizilip jatyr. BQO boıynsha ekonomıkalyq tergeý departamenti men ishki ister organdarynyń tájirıbe qyzmetkerlerinen jedel tergeý toby quryldy. Eger kimde-kim «Chia Tai Pharmaceutical» kompanııasynan zardap shekse, jergilikti ishki ister organdaryna nemese Oral qalasy A. Kárımýllın kóshesi, 2/2-mekenjaıynda ornalasqan BQO boıynsha ekonomıkalyq tergeý departamentine (telefony: 8-7112-53-84-23) habarlasa alady», - dep málimdedi vedomstvodan.

Eske sala keteıik, budan buryn BQO turǵynynan 1 tonnadan astam alkogol ónimi tárkilengenin jazǵan bolatynbyz.