BQO-da 54 jańa avtobýs shalǵaı eldi mekender balalaryn mektepke tasymaldamaq

ORAL. QazAqparat – Oral qalasynda 9 «PAZ» avtobýsy Aqjaıyq, Báıterek, Jańaqala, Kaztalov jáne Syrym aýdandarynyń mektepterine saltanatty túrde tabys etildi, dep habarlaıdy QazAqparat tilshisi.

Saltanatty rásimge qatysqan oblys ákiminiń orynbasary Baqytjan Narymbetovtiń aıtýynsha, mektepteri joq eldi mekender balalaryn tasymaldaý úshin barlyǵy 54 avtobýs satyp alynbaq.

«Memleket basshysy Qasym-Jomart Toqaevtyń 2022 jyldy Balalar jyly dep jarııalaǵany belgili. Osy oraıda, oqýshylardyń kúndelikti tasymaldaýyn sapaly uıymdastyrý jáne avtokólikterdi jańartý úshin respýblıkalyq bıýdjetten oblysqa 54 avtobýsty qarjylyq lızıngi arqyly satyp alý úshin barlyǵy 2 799 599,7 teńge kóleminde qarajat bólindi. ıAǵnı eski kólikterdi jańa avtobýstar almastyrady. Sonyń nátıjesinde mektepteri joq 73 eldi mekende turatyn 4 062 bala kún saıyn 56 bilim ordasyna tasymaldanady. Búgin 21 oryndyq 9 «PAZ» avtobýsy aýdandarǵa berilse, qalǵan 45-in osy jyldyń sońyna deıin jetkizý josparlanýda. Jańa oqý jyly tabysty bolsyn!» - dedi Baqytjan Narymbetov.

BQO bilim basqarmasynan túsken málimetke qaraǵanda, respýblıkalyq bıýdjettik komıssııa sheshimine sáıkes mektep jasyndaǵy balalardy tasymaldaýǵa arnalǵan avtobýs 54 mektepke beriledi. Kúni búgin Syrym, Jańaqala aýdandaryna bir-birden, Báıterek pen Aqjaıyqqa eki-ekiden, Kaztalovqa úsh avtobýs tapsyryldy. Qalǵan 45 avtobýs kelgen soń, olar da osylaı qajettilikke qaraı bólinetin bolady.

Eske sala keteıik, budan buryn Batys Qazaqstanda 108 myńnan astam shákirttiń bes kúndik oqý aptasyna kóshetinin jazǵan bolatynbyz.