BQO-da 53 myńnan astam adam jumyspen qamtý is-sharalaryna tartyldy
BQO jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Isataı Myńbaevtyń óńirlik kommýnıkatsııalar qyzmeti alańynda ótken brıfıngide málim etkenindeı, koronavırýstyq indetke baılanysty halyqty jumyspen qamtýdyń mańyzy arta túsýde.
Karantındik rejım engizilgennen keıin kóptegen mekeme men óndiris oryndary ýaqytsha jabylyp, bul turǵyndardyń jumysy men tabysynan aıyrylýyna ákep soqty.
Osy oraıda Memleket basshysynyń tapsyrmasyna sáıkes Úkimet jedel is-sharalar qabyldap, sonyń birqatary jumyspen qamtý máselesine qatysty júzege asyrylýda.
I.Myńbaevtyń aıtýynsha, 53 myńnan astam adam memlekettik baǵdarlamalar aıasyndaǵy is-sharalarǵa tartyldy. Atap aıtqanda, «Eńbek» memlekettik baǵdarlamasy boıynsha 29,6 myń, Jumyspen qamtýdyń jol kartasyna sáıkes 7,9 myń jáne ózge baǵdarlamalar boıynsha 15,8 myń adam qamtyldy.
«Eńbek» baǵdarlamasy úsh baǵyt boıynsha júzege asyrylýda.
Birinshi baǵyt - tehnıkalyq jáne kásiptik bilimmen jáne qysqa merzimdi kásiptik oqytýmen qamtamasyz etý.
BQO boıynsha bıyl tehnıkalyq jáne kásiptik bilimi bar kadrlardy daıyndaýǵa 800 adamdy qabyldaý kerek bolsa, 1 qyrkúıekten bastap 762 adam oqý oryndaryna ornalastyryldy. Olar oqýdy tóleý, bir ret ystyq tamaq, stıpendııa berý, jol júrý aqysyn óteý boıynsha memlekettik qoldaýmen qamtamasyz etildi.
Sol sekildi 20 jeltoqsanǵa deıin 340 adam qysqa merzimdi kýrstarǵa jiberilip, sonyń 294-i támamdap shyqty. Solardyń ishinen 209-y nemese 71 paıyzy jumysqa ornalastyryldy.
Qazirgi ýaqytta qysqa merzimdi oqytý tek jumys berýshilerdiń ótinimderi men eńbek naryǵyndaǵy qajettilikterge sáıkes júrgiziledi.
Ekinshi baǵyt – azamattardyń kásipkerlik bastamalaryna járdemdesý.
Bıyl 1113 adam 4,4 mlrd teńgeni quraıtyn jeńildetilgen shaǵyn nesıe aldy. Bul – jyldyq jospardyń 106,7 paıyzy. Sonyń ishinde 198-i – óz jumysyn jańadan bastaǵan kásipkerler, 60-y – az qamtylǵan otbasylar.
Sondaı-aq baǵdarlamaǵa qatysýshylarǵa jergilikti jáne respýblıkalyq bıýdjetten 1,1 mlrd teńge memlekettik grant berý kózdelgen bolatyn. Barlyǵy 2025 grant berilip, jyldyq jospar tolyqtaı oryndaldy. Grant alǵandardyń 708-i nemese 35 paıyzy – az qamtylǵan jáne kóp balaly otbasy músheleri.
Úshinshi baǵyt jumyssyzdardy sýbsıdııalanatyn jumys ornyna ornalastyrý bolsa, buǵan 11 myń adam (áleýmettik jumys oryndaryna – 832, jastar tájirıbesine – 1869, qoǵamdyq jumystarǵa – 8327) jiberilip, jyldyq jospar 120 paıyzǵa oryndaldy.
-Jumyspen qamtýdyń 2020-2021 jyldarǵa arnalǵan jol kartasy ınfraqurylymdyq jobalardy iske asyrý arqyly qosymsha jumys oryndaryn qurýǵa baǵyttalǵan daǵdarysqa qarsy jańa baǵdarlama bolyp tabylady. Bul baǵytta oblys boıynsha júzege asyrý úshin tańdalǵan 172 ınfraqurylymdyq jobaǵa 35,5 mlrd teńge qarastyryldy. Sonyń ishinde áleýmettik salaǵa – 67, turǵyn úı-kommýnaldyq sharýashylyqqa – 17, ınjenerlik jáne kólik ınfraqurylymyna – 55, eldi mekenderdi abattandyrýǵa 33 joba baǵyttaldy. Kúni búgin 172 joba boıynsha 7866 adam jumys tapty, bul – jospardyń 90 paıyzy, - deıdi basqarma basshysynyń orynbasary.
Onyń sózine qaraǵanda, qazirgi tańda elektrondy eńbek bırjasy portaly jumys izdeýshiler men jumys berýshiler tıimdi bolyp tur. Osy portalda 12 myń jumys berýshi men sonsha jumys izdeýshi tirkelgen. Kúni búgin 4,7 myń bos jumys orny ózekti bolyp tur, osy alań arqyly bıyl 2,8 myń jumyssyz óz ornyn tapty.
Jyl basynan beri ekonomıka salasynda 18,5 myń jańa jumys orny ashylsa, sonyń 10 myńdaıy turaqty bolyp tabylady.
Azamattar jumyspen qamtý ortalyqtaryna jıi júginedi. Sonyń nátıjesinde memlekettik baǵdarlamalar men basqa da jumys oryndaryna ornalasý kórsetkishi 13 esege artyp otyr.
«Resmı jumyssyz retinde tirkelgen 6 myń adam memlekettik áleýmettik saqtandyrý qorynan arnaıy tólemder alýda. Sondaı-aq koronavırýsqa qatysty shekteýler saldarynan tabyssyz qalǵan 251,1 myń adamǵa tótenshe jaǵdaı kezinde 10,6 mlrd teńge, al shilde-tamyz aılarynda 77,8 myń adamǵa 3,3 mlrd teńge tólendi», dedi I.Myńbaev.