BQO-da 451 myń gektar aýylsharýashylyq jeri paıdalanylmaı otyr

ORAL. QazAqparat – Batys Qazaqstan oblysynda 451 myń gektar aýyl sharýashylyǵy jeri paıdalanylmaı otyr, dep habarlaıdy QazAqparat tilshisi.

BQO jer qatynastary basqarmasynyń basshysy Murat Ómirálıevtiń Óńirlik kommýnıkatsııalar qyzmeti alańynda ótken brıfıngide málim etkenindeı, 2019-2022 jyldary oblys boıynsha 1 mln 389 myń gektar jerdiń paıdalanylmaı jatqany anyqtalǵan.

Sonyń ishinde bıyl 196 myń gektardyń ıgerilmegeni belgili boldy.

Basqarma basshysynyń sózine qaraǵanda, jergilikti atqarýshy organdar tarapynan júrgizilgen jumystardyń nátıjesinde 220 myń gektar jer memleket menshigine qaıtaryldy.

Sondaı-aq 718 myń gektardy jer telimderiniń paıdalanýshylary maqsatyna saı ıgerýge kiristi.

M.Ómirálıevtiń aıtýynsha, aýyl sharýashylyǵy jerlerine baqylaýdy kúsheıtý maqsatynda mańyzdy qadam jasalyp, bıyl baqylaý qyzmeti ortalyq ýákiletti organǵa qaıtaryldy. ıAǵnı jerdi ákimdikter bergenimen, onyń paıdalanylýyn baqylaý men qadaǵalaý oblys deńgeıinde qurylǵan jer resýrstaryn basqarý departamentine júkteldi.

«Osyǵan oraı paıdalanylmaı jatqan 451 myń gektar jer telimderi boıynsha materıaldar atalǵan departamentke tekserý júrgizý úshin joldanýda. Sonymen qatar paıdalanylmaı jatqan jerlerdi aınalymǵa engizýdi jedeldetý jáne baqylaýdy kúsheıtý maqsatynda tekserý men májbúrlep alyp qoıý merzimi 2 jyldan 1 jylǵa qysqartyldy», - dedi basqarma basshysy.

Oblysta aýyl sharýashylyǵy maqsatyndaǵy jalpy jer kólemi 7 mln 756 myń gektar bolsa, sonyń 564,3 myńy – egistik, 1,9 myńy – kópjyldyq ekpeler, 536,1 myńy – tyńaıǵan jerler, 500,5 myńy – shabyndyq, 6097 myńy – jaıylym, 56 myńy – ózge de alqaptar.

«Aýyl sharýashylyǵy maqsatyndaǵy jerlerdiń konkýrs arqyly tabystalatyny belgili. Oblys kóleminde aýyl sharýashylyǵy jerlerin óndiristik qyzmetke tartý maqsatynda 2021-2022 jyldar aralyǵynda 67 konkýrs ótkizilip, 3 myńǵa jýyq (2679) ótinim qabyldandy. Nátıjesinde 499 myń gektardy quraıtyn 677 jer telimi tabystaldy. Bıyl aýdandyq ákimdikter 80 myń gektardy quraıtyn 133 jer telimi boıynsha 12 konkýrs ótkizýdi josparlap otyr», dedi M.Ómirálıev.

Eske sala keteıik, budan buryn Batys Qazaqstan oblysynda 105 myńǵa jýyq adamnyń jer kezeginde turǵanyn jazǵan bolatynbyz.