BQO-da 34 eldi mekenge gaz qubyry tartylady

ORAL. QazAqparat - Batys Qazaqstan oblysynda bes aýdanda 34 eldi mekenge gaz qubyry tartylady. Bul týraly búgin oblys ákimi Altaı Kólginov turǵyndarmen eseptik kezdesýinde aıtty, dep habarlaıdy «QazAqparat» HAA tilshisi.

Óńir basshysynyń sózine qaraǵanda, shalǵaıdaǵy Bókeı ordasynda 11, sondaı-aq Aqjaıyq, Jańaqala, Jánibek, Syrym aýdandarynda taǵy 23 eldi mekenge gaz jetkiziledi.

Oǵan qosa oblys ortalyǵyndaǵy Oral jylý-qýat ortalyǵyna rezervtik gaz qubyry qurylysy (2 mlrd. teńge) aıaqtalady.
  

«Qazirgi tańda turǵyndardyń 93,6 paıyzdan astamy, ıaǵnı 275 aýyl, 593 myń turǵyn «kógildir otynmen» qamtylǵan. Ótken jyly Syrym, Qaratóbe, Shyńǵyrlaý, Terekti aýdandarynyń 17 aýylyna gaz qubyry tartylyp, 8 myńnan astam turǵyn ot jaǵyp, kúl shyǵarý mashaqatynan qutyldy. Aldaǵy maqsat - oblys turǵyndaryn gazben túgeldeı qamtý», dedi Altaı Kólginov.