BQO-da 31 mln teńgeniń zańsyz temeki ónimderin satýmen aınalysqan kásipker sottaldy

<p>ORAL. KAZINFORM &mdash; Batys Qazaqstan oblysynda bıyl qaıdan shyǵarylǵany belgisiz 100 myńnan astam temeki qoraby kóleńkeli aınalymnan alyndy.</p>

BQO boıynsha ekonomıkalyq tergep-tekserý departamenti basshysynyń orynbasary Ersaıyn Jumabaevtyń óńirlik kommýnıkatsııalar qyzmeti alańynda ótken brıfıngte málim etkenindeı, jeke kásipker Oral qalasy aýmaǵynda zańsyz kásipkerlikpen aınalysqan.

Atap aıtqanda, shetelden shyǵarylǵan, tsıfrlyq tańbalaýsyz, túrli markadaǵy quny 31 mln astam teńge turatyn 41 myńnan astam temeki qorabyn zańsyz tasymaldap, saqtap, ótkizgen.

«Atalǵan kásipker 2023 jylǵy shilde aıynda Oraldaǵy «Mırlan» ortalyq bazar aýmaǵynda zańsyz temeki ónimderin satqan. Oǵan qosa Zachagan kentindegi avtokólikke tehnıkalyq kómek kórsetý stantsııasyn qoıma retinde paıdalanyp, temekini saqtaǵan», dedi E.Jumabaev.

Oral qalalyq sotynyń úkimimen sottalýshy QR QK 214-baby 1-bóligine sáıkes aıypty dep tanyldy. Oǵan 1 myń AEK kóleminde, ıaǵnı 3 mln 692 myń teńge aıyppul salyndy.

Úkimge sáıkes barlyq temeki ónimderi, sondaı-aq sottalýshy temeki ónimderin tasymaldaǵan kezde qylmys quraly retinde paıdalanǵan «OPEL ZAFIRA» avtokóligi memleket paıdasyna tárkilendi.

Eske sala keteıik, budan buryn BQO-da ekonomıkalyq qylmystan 628 mln teńge zalal kelgenin jazǵan edik.