BQO-da 180 myńǵa jýyq adam koronavırýsqa qarsy vaktsına saldyrdy

ORAL. QazAqparat – Batys Qazaqstan oblysynda 179 966 adam koronavırýsqa qarsy vaktsınanyń birinshi komponentin saldyrdy, dep habarlaıdy QazAqparat tilshisi.

BQO densaýlyq saqtaý basqarmasynyń baspasóz qyzmeti málim etkenindeı, sonyń 137 443-i ekinshi komponentpen egildi.

Basqarma málimetine qaraǵanda, qazirgi kezde óńirde reseılik «Spýtnık V»-dan basqa keıbir egý kabınetterinde otandyq «QAZVAC» jáne qytaılyq «CoronaVac» vaktsınalary bar. Jýyq arada otandyq, reseılik, qytaılyq, al kúzde amerıkandyq vaktsına túsýi kerek.

Oblysta kúni búginge deıin 15360 pedagog (97,8 paıyz) egildi.

Jyl basynan beri óńirde 23462 adam koronavırýs juqtyrdy. Sonyń 1906-sy – balalar. 1819-y saýyǵyp ketkenimen, 87 bala áli aýyryp jatyr.

Sońǵy aptada aldyńǵymen salystyrǵanda, vırýs juqtyrý kórsetkishi 11,1 paıyzǵa (121 naýqasqa) kemigenimen, aýrýhanaǵa túsip jatqandar sany azaıyp otyrǵan joq.

Qazirgi tańda 1459 tósektik 20 ınfektsııalyq statsıonarda 659 naýqas em qabyldaýda. Sonyń ishinde Oral qalasynda 911 tósektik 7 aýrýhanada 532 adam jatyr. Jansaqtaý bólimshelerinde jatqandar 53-ke jetti.

Eske sala keteıik, budan buryn BQO-da tórt kúnde 500-ge jýyq adamnyń koronavırýs juqtyrǵanyn jazǵan bolatynbyz.