BQO-da 14 myńnan astam oqýshyǵa qazaq tilin úırenýge jaǵdaı jasalǵan
Halyqaralyq ana tili kúni aıasynda ótken atalmysh jobanyń ashylý rásiminde málim etilgenindeı, ótken jyly uıymdastyrylǵan dóńgelek ústel, semınar, kýrs, trenıng, ulttyq-sporttyq oıyndarǵa 10 myńdaı bala qatysyp, sonyń 2345-i memlekettik tildi birshama meńgerip úlgerdi.
«Úsh tuǵyrly til - zaman talaby» atty dóńgelek ústelge qatysýshylar elimizde qazaq tiline basymdyq berilgeni, memlekettik tildi sapaly úırenýdiń joldary jáne úsh tildilikke kezeń-kezeńmen kóshý jóninde sóz qozǵady. BQO bilim basqarmasy basshysynyń orynbasary Záýre Ǵumarovanyń aıtýynsha, qazirgi kezde oblysta úsh tildilik aıasynda 57 maman dáris beredi. «2015-2020 jyldarǵa arnalǵan úsh tilde bilim berýdi damytýdyń jol kartasyna» sáıkes ótken jyly jergilikti bıýdjet esebinen Batys Qazaqstan ınnovatsııalyq-tehnologııalyq ýnıversıteti bazasynda 583 jaratylystaný-matematıka pánderi muǵalimi úshin aǵylshyn tilin úırený kýrsy uıymdastyryldy. Al M.Ótemisov atyndaǵy Batys Qazaqstan memlekettik ýnıversıtetinde 45 muǵalim bilimin jetildirdi. Osyndaı kýrstar men dárister, tájirıbe almasýlar bıyl da uıymdastyrylmaq.
Oblysta úsh jáne odan kóp til biletin oqýshylar az emes. Mysaly, Oral qalasyndaǵy №23 orta mekteptiń 8-synyp oqýshysy Fatıma Abdırova tórt tilde sóıleıdi. «Meniń anam - qazaq, ákem - túrik. Men qazaq, orys, túrik tilderinde erkin sóıleımin, aǵylshyn tilin úırený ústindemin. Memlekettik tildi bilýge arnalǵan qalalyq baıqaýlarǵa qatysyp júrmin. Qazaq elinde turatyn túrli ult ókilderiniń tilin, salt-dástúri men mádenıetin bilseń, rýhanı jaǵynan odan saıyn baıı túsesiń», deıdi ol. Al Oraldaǵy №35 mektep-lıtseıiniń shákirti Anna Korsýn jýyrda memlekettik til baıqaýynda óleń oqýdan úshinshi oryndy ıelendi. Sol sekildi №36 orta mekteptiń 8-synyp oqýshysy, ulty ázirbaıjan Dılnaz Mýstofaeva, Oral gaz, munaı jáne salalyq tehnologııalar kolledjiniń 2-kýrs stýdenti, belorýs jigiti Ivan Mıronkov qazaq tilin jaqsy biledi.
Tasqala aýdanynyń túlegi, M.Ótemisov atyndaǵy Batys Qazaqstan memlekettik ýnıversıtetin bitirgen ýkraın qyzy Irına Jılık №26 orta mektepte qazaq tili men ádebıetinen sabaq berýmen birge evreı etnomádenı birlestiginiń jumysyna da atsalysyp keledi.
Dóńgelek ústeldi qorytyndylaǵan Qazaqstan halqy BQO assambleıasy tóraǵasynyń orynbasary Ǵaısa Qapaqov úsh tildi úırený zaman talaby ekendigin, onyń adamdy jan-jaqty qalyptastyrýǵa yqpal etetindigin jetkizdi.
Osy kúni sondaı-aq «Dostyq, kelisim jáne taǵattylyq» taqyrybynda ashyq sabaqtar da ótkizildi. Belsendi jumysymen tanylǵandar men ónerli balalar marapattaldy.