BQO-da 139 qatty turmystyq qaldyqtar polıgony zańsyz jumys isteıdi

<p>ORAL. KAZINFORM &mdash; Batys Qazaqstan oblysynda ekologııalyq máseleler aımaqtaǵy mańyzdy problemalardyń biri bolyp qalyp otyr.</p>

QR Sybaılas jemqorlyqqa qarsy is-qımyl agenttigi BQO boıynsha departamentiniń basshysy Ádilhan Sabýrovtyń málim etkenindeı, óńirde ekologııalyq máseleler boıynsha júrgizilgen syrtqy taldaý qorytyndysyna sáıkes 9 sybaılas jemqorlyq táýekeli anyqtalyp, 21 usynys berildi.

Onyń sózine qaraǵanda, oblys aýmaǵynda tek 8 qatty turmystyq qaldyqtar polıgonynda ǵana ruqsat qujattary bar. Qalǵan 139 polıgon ekologııalyq jáne sanıtarlyq-epıdemıologııalyq zańnamanyń talaptaryna sáıkes kelmeıdi, tıisinshe olar zańsyz jumys isteýde.

- Qaldyqtardyń qorshaǵan ortaǵa áseri týraly deklaratsııalamaý, kelip túsetin qaldyqtardy baqylaý men esepke alýdy júzege asyrmaý, sondaı-aq qaldyqtardy bólý rásimin saqtamaý jáne polıgondarda dezınfektsııalaýshy beton vannalarynyń bolmaýyna baılanysty táýekelder anyqtaldy. Bul qorshaǵan ortaǵa zııandy áser etip, topyraq pen sýdyń lastanýyna soqtyrýy, sondaı-aq emıssııa úshin ótemaqy almaý túrindegi memleketke zalal keltirýi múmkin, - deıdi Á.Sabýrov.

Sonymen qatar departament basshysy kommýnaldyq qaldyqtardy ruqsatsyz jaǵýǵa qatysty alańdaýshylyq tanytty. Atap aıtqanda, 2021 jyldan bastap qatty turmystyq qaldyqtar polıgondarynda 40 (2021 jyly – 4, 2022 jyly – 12, 2023 jyly – 13, 2024 jyly – 11), sonyń ishinde tabıǵı polıgondarda 7 órt tirkelgen.

- Mysaly, Oral qalasyndaǵy senimgerlik basqarýǵa berilgen qatty turmystyq qaldyqtar polıgonynda jyl basynan beri kommýnaldyq qaldyqtar úsh ret janǵan. Mundaı jaǵdaı jylma-jyl qaıtalanyp otyrady. Bizdiń bastamamyzben atalǵan polıgonda BQO ekologııa departamenti ekologııalyq zańnama talaptarynyń buzylýyna jospardan tys tekserý júrgizdi. Sonyń nátıjesi boıynsha senimger basqarýshy ákimshilik jaýapkershilikke tartyldy jáne anyqtalǵan buzýshylyqtardy joıýǵa nusqama berildi. Osylaısha, balans ustaýshylar tarapynan senimgerlik basqarýshylar baqylanbaıdy, bul QTQ polıgondarynyń júıeli túrde órtenýine soqtyrady, - dedi Á.Sabýrov.

Eske sala keteıik, budan buryn Batys Qazaqstanda basty ekologııalyq másele qandaı ekendigin jazǵan bolatynbyz.