BQO-da 111 ınvestıtsııalyq joba pýly jasaqtaldy
«Memleket basshysy Qasym-Jomart Kemeluly Toqaev «qazirgi tańdaǵy bizdiń basty mindetimiz – halyqtyń ál-aýqatyn arttyrý, azamattardyń tabysyndaǵy alshaqtyqty azaıtý jáne eńbek etýge qolaıly jumys oryndaryn ashý» dep naqty aıtqan bolatyn. Oblys ekonomıkasynyń negizgi salalary boıynsha 4 aıdyń qorytyndysynda byltyrmen salystyrǵanda turaqty ósimge qol jetkizildi. Atap aıtqanda, óńdeý ónerkásibi – 20,6, aýyl sharýashylyǵynyń jalpy ónimi – 4,7, qurylys jumystarynyń kólemi - 34, turǵyn úılerdi iske qosý – 2,1, negizgi kapıtalǵa ınvestıtsııalar 34,6 paıyzǵa ósip otyr»,- dedi óńir basshysy.
Onyń aıtýynsha, jalpy óńirlik ónimniń óndirilgen kólemi 2022 jyldyń 9 aıynyń qorytyndysynda 1,3 paıyzǵa ósip, 2 trln 876 mlrd teńgeni qurady. Óńir ekonomıkasyn ártaraptandyrý maqsatynda jalpy quny 1,9 trln teńgege 5 myńnan astam jumys ornyn qurýmen 111 ınvestıtsııalyq joba pýly jasaqtaldy. Onyń ishinde 2023 jyly 46 mlrd teńgege 1 300 jumys oryn qurýmen 54 joba iske qosý josparlanǵan. Búgingi kúni 14 mlrd teńgege 500-ge jýyq jumys ornyn qurýmen 12 joba iske qosyldy.
«Sonymen qatar, sheteldik ınvestorlardyń qatysýymen óńirde birqatar jobalar qolǵa alynýda. Atap aıtsaq, KPO b.v. kompanııasymen Qarashyǵanaqty keńeıtý jobasynyń Ikezeni 5-shi kompressordy ornatý jumysy júrgizilýde. Investıtsııa kólemi 970 mln AQSh dollardy quraıdy. Al II kezeńi boıynsha 6-shy kompressordy ornatý boıynsha jobalaý jumystary júrgizilýde. Investıtsııa kólem – 735 mln AQSh dollary», - dedi Narıman Tóreǵalıev.
Oblys basshysynyń dereginshe, relokatsııa aıasynda shetel kapıtalynyń qatysýymen kabeldi ónimder úshin flanetstar óndirisi, fanera, tereze jaqtaýy men tósenishi men esikter óndirisi sııaqty 152 jumys ornyn qurýmen 3,5 mlrd teńgege 4 joba iske asyrylyp jatyr.
«Osy jyldyń maýsym aıynda quny 1,4 mlrd teńgege 100 jumys oryn qurýmen bıgbeg óndirisi jobasy iske qosylatyn bolady», - dedi oblys basshysy.