BQO-da 10 jastaǵy balaǵa býllıng jasalǵan: jasóspirimniń anasy jaýapqa tartyldy

<p>ORAL. KAZINFORM &ndash; Oral qalasynyń ákimshilik quqyq buzýshylyq ister jónindegi mamandandyrylǵan sotynda 10 jasar G-ny qorqytyp, aqshasyn tartyp alǵan 13 jasar R-dyń anasyna qatysty ákimshilik is qaraldy.</p>

BQO sotynyń baspasóz qyzmetinen málim etkenindeı, R-dyń anasy sotta balasynyń G-ny uryp-soqqanyn, óz ulymen sóıleskenin jáne qorlaýdy joqqa shyǵarǵanyn rastady.

G-nyń anasynyń aıtýynsha, ulyn qorqytý áreketi 2 jylǵa jýyq ýaqytqa sozylǵan, balasy qorqyp qalǵan, uzaq ýaqyt boıy ózin qorqytqan balanyń atyn aıtpaǵan. Ol tatýlasýdan úzildi-kesildi bas tartty.

R-dyń qorlaý faktisi sot zalynda ákimshilik quqyq buzýshylyq týraly hattamada belgilengen mán-jaılarmen, jábirlenýshiniń aryzymen, kýálar men kýágerlerdiń jazbasha túsiniktemelerimen jáne istiń basqa materıaldarymen rastaldy.

QR Ákimshilik quqyq buzýshylyq týraly kodeksi 127-2-babynyń 1-bóligine sáıkes kámeletke tolmaǵan adamdy jábirleý (býllıng, kıberbýllıng) úshin jaýaptylyq eskertý jasaýǵa nemese 10 AEK mólsherinde aıyppul salýǵa ákep soǵady.

«Sot R-dyń anasyna ákimshilik jaza taǵaıyndaý kezinde onyń asyraýynda kámeletke tolmaǵan úsh balasy baryn, jumysynyń joqtyǵyn jáne turaqty tabysynyń bolmaýyn, jaýaptylyqty aýyrlatatyn mán-jaılardyń anyqtalmaǵanyn eskerdi. Sot atalmysh kodekstiń 829-14 jáne 829-16-baptaryn basshylyqqa ala otyryp, R-dyń anasyn kodekstiń 127-2-babynyń 1-bóligimen kináli dep tanyp, oǵan ákimshilik jaza – eskertý taǵaıyndady. Qaýly zańdy kúshine engen joq», - dep habarlady vedomstvodan.

Eske sala keteıik, budan buryn Batys Qazaqstanda burynǵy aýdan ákimi bostandyqqa shyqqanyn jazǵan edik.