BQO-da 10 mln teńge bıýdjet qarjysyn jymqyrǵan mekeme zańgeri 3 jylǵa sottaldy

<p>ORAL. KAZINFORM &mdash; Batys Qazaqstan oblysynda memlekettik sektorda sheneýnikterdiń, sonyń ishinde mekeme esepshileriniń bıýdjet qarjysyn jymqyrýy tyıylmaı otyr.</p>

BQO boıynsha ekonomıkalyq tergep-tekserý departamenti basshysynyń orynbasary Ersaıyn Jumabaevtyń málim etkenindeı, Terekti aýdanynda alaıaqtyq jasady dep aıyptalǵan memlekettik mekemeniń bas mamanyna (zańgerine) qatysty qylmystyq iske núkte qoıyldy.

Onyń sózine qaraǵanda, áıel qyzmettesteriniń senimine kire otyryp, iri kólemde qarjy jymqyrǵan. Atap aıtqanda, basshylyqtyń ókimimen rastalmaǵan óziniń syıaqysy, issaparlar men ústemeaqy týraly jalǵan derekter berip, sonyń nátıjesinde onyń «Qazaqstan Halyq banki» AQ-daǵy esepshotyna qarjy negizsiz aýdarylǵan. Saldarynan memleketke 10 mln astam teńge zalal keltirilgen. 

«Terekti aýdandyq sotynyń úkimimen zańger QR QQ 190-baby 3-bóligi 1, 2-tarmaqtaryna sáıkes kináli dep tanylyp, múlkin tárkileýsiz, 3 jylǵa bas bostandyǵynan aıyrý jazasy kesildi. Sonymen qatar ol belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyryldy. Qazirgi tańda osyǵan uqsas ister departamentte tergelip jatyr», - dedi E.Jumabaev.

Eske sala keteıik, budan buryn BQO-da 31 mln teńgeniń zańsyz temeki ónimderin satýmen aınalysqan kásipkerdiń sottalǵanyn jazǵan edik.