BQO aýylynda qańǵybas ıtter qoılar men úı qustaryn qyryp ketken
Okrýgke qarasty Asan aýyly Solnechnaıa kóshesi 6-úı, 2-páterde turatyn 71 jastaǵy Naǵym Ǵalıýllınniń málim etkenindeı, sońǵy eki kúnde qańǵybas ıtter 103 qazy men elý shaqty taýyǵyn qyryp tastaǵan.
Onyń sózine qaraǵanda, eki-úsh aı buryn 36 bas, ótken jyly 89 taýyǵy dál osylaı shyǵynǵa ushyraǵan.
«Shabýyldaǵan tórt ıt sekildi. Úsheýin ustap, qoraǵa qamap qoıdym. Jeksenbi kúni aýyl ákimi, aýdannyń bas mal dárigeri kelip, qaraıdy deıdi. Byltyr da, bıyl da osylaı shyǵynǵa qalyp otyrmyn. Ony kim óteıdi, bilmeımin», deıdi N.Ǵalıýllın.
Mıchýrın aýyly Komsomol kóshesi 46-úıde turatyn 68 jastaǵy Ánýarbek Nurjanovtyń aıtýynsha, 13 bas qoı men bir qozysyna 9 qarasha kúni tańmen ıtter shabýyldaǵan.
«Qoıymnyń beseýi ólip qaldy. Qalǵanynyń jaǵdaıy shamaly. Aq-adal malymnyń osyndaı kúıge ushyraǵanyna qynjylamyn», deıdi Á.Nurjanov.
BQO polıtsııa departamentiniń baspasóz qyzmetinen túsken málimetke qaraǵanda, 9 qarasha kúni Mıchýrın aýylynyń turǵyny, 68 jastaǵy azamattyń 10 qoıyn qańǵybas ıtter tistep tastaǵany týraly aryzy Prıýral polıtsııa bóliminde tirkeldi.
«Qazirgi ýaqytta atalǵan derek boıynsha jergilikti ákimdik pen veterınarlyq stantsııaǵa tıisti sharalar qabyldaý úshin usynymhat joldandy», - dep habarlady vedomstvodan.
Mıchýrın aýyldyq okrýginiń ákimi Maksım Mýsalımov atalmysh oqıǵa týraly polıtsııa bólimi men veterınarlyq stantsııaǵa habarlanǵanyn, qosymsha 40 qańǵybas ıt pen mysyqty aýlaýǵa ótinim berilgenin jetkizdi.
«Jyl basynan beri ótinimge sáıkes 115 buralqy ıt-mysyq aýlandy. Bulardyń kóbeıýiniń sebebi – jergilikti turǵyndar ıt pen mysyqty ustaǵanmen, ony tıisinshe kútpeı, tamaǵyn bermeı, betimen bos jiberedi. Taǵy bir sebebi – Mıchýrın men Asan aýyly aýmaǵynda 4-5 baý-baqsha seriktestigi bar. Seriktestik músheleri saıajaıdy kúzetý úshin kúshik asyraıdy da, ony kúzde qaldyryp ketedi. Sodan ashyqqan ıt azyǵyn izdeıdi», deıdi M.Mýsalımov.
Eske sala keteıik, budan buryn Oral qalasy turǵynynyń qoıyn ıtter taǵy da qyryp ketkenin jazǵan bolatynbyz.
Oral qalasynyń turǵyny Esengeldi Aıtmuhambetovtiń sózine qaraǵanda, oqıǵa 5 qarashaǵa qaraǵan túni bolǵan. Budan buryn 18 qazan kúni bolǵan oqıǵa kezinde onyń 150 bas qoıynyń 86-syn qyryp ketken edi.
Zachagan kentiniń ákimi Aqqalı Áýbekerovtiń aıtýynsha, 46 qoıdyń 10-y ólgen. Jeteýi jaraly, soıyldy, 29-y ǵana saý.