BQO aýdandarynda koronavırýsqa qarsy egý jumystary bastaldy
BQO densaýlyq saqtaý basqarmasy basshysynyń mindetin atqarýshy Arman Qalıbekovtiń málim etkenindeı, óńirge ákelingen 1 myń doza aldymen medıtsına qyzmetkerlerine egilýde.
Arman Talǵatulynyń sózine qaraǵanda, 1 aqpannan bastap Oraldaǵy alty qalalyq emhana men «Medıtsınalyq ortalyq» JShS-da búginge deıin 240 adam reseılik «Gam-COVID-Vak» vaktsınasymen (Sputnik V) egilip úlgerdi.
«Alǵashqy kúnderde baıqalǵanyndaı, vaktsına oń nátıje berýde. Egilgen adamdardyń ózderiniń aıtýynsha, olar jaısyz ózgeristi sezbegen. Inektsııa aýyrtpalyqsyz, azdap syzdaýmen ótýde. Dárigerler vaktsınatsııanyń arqasynda ǵana juqpaly indetke tosqaýyl qoıyp, burynǵy ómir saltymyzǵa qaıta oralýǵa bolatynyn jaqsy túsinedi. Buǵan deıin Oraldaǵy medıtsına qyzmetkerleri egilip jatsa, búgin osyndaı ekpe jumystary Báıterek jáne Terekti aýdandaryndaǵy aýrýhanalarda bastaldy. Aldaǵy ýaqytta osylaısha jalǵasa beredi», dedi QazAqparat tilshisine A.Qalıbekov.
Qazirgi tańda oblysta jeti juqpaly aýrýlar aýrýhanasynda 291, tórt karantındik statsıonarda 26 adam emdelýde. 20 naýqas jansaqtaý bóliminde jatsa, solardyń tórteýi – 40-60, 14-i – 60-80 jas aralyǵyndaǵylar, ekeýi – 80-nen asqandar.
Sonyń ishinde 16 naýqas kovıdke qosymsha júrek-qan tamyrlary aýrýlary, bireýi qant dıabeti, taǵy bireýi revmatoıdty artrıtke shaldyqqan.
Kúni búgin ınvazıvti ókpeni jasandy jeldetý apparatyna 1, ınvazıvti emes apparatqa 11, ottegi kontsentratoryna 11, ortalyqtandyrylǵan ottegi kózine 56 adam qosylǵan.
Eske sala keteıik, budan buryn Batys Qazaqstanda 240 adamnyń koronavırýsqa qarsy egilgenin, 31 mektepte 42 synyptyń karantınge jabylǵanyn jazǵan bolatynbyz.