BQO assambleıasy prezıdenttik saılaý ótkizýdi qoldaıdy

ORAL. QazAqparat - Qazaqstan halqy BQO assambleıasynyń músheleri kezekten tys prezıdenttik saılaý ótkizýdi qoldady, dep habarlaıdy QazAqparat tilshisi.

Aktıv otyrysyn ashqan óńirlik assambleıa tóraǵasynyń orynbasary, hatshylyq meńgerýshisi Ǵaısa Qapaqov QR Prezıdenti Qasym-Jomart Toqaevtyń Qazaqstan halqyna jarııalaǵan úndeýiniń mán-mańyzy zor ekendigin atap kórsetti.

Oblystyq qoǵamdyq kelisim keńesiniń múshesi, «Batys Qazaqstan oblysy avtobýs parki» JShS dırektory Nurlybek Birmanov eldegi qoǵamdyq-saıası jaǵdaıǵa qysqasha toqtalyp, merziminen buryn prezıdenttik saılaýdy ótkizýdiń oryndy ekendigin, sondyqtan árkimniń azamattyq belsendilik tanytyp, osynaý saıası naýqanǵa belsendi qatysý qajettigin jetkizdi.

BQO analar keńesiniń múshesi Altynaı Esqalıeva Qazaqstannyń damýy onyń basshysyna baılanysty ekendigin, sondyqtan ony durys tańdaı bilý úshin qoǵamdyq uıymdardyń da saılaýǵa belsendi atsalysatynyn atap ótti.

Otyrysta sondaı-aq M.Ótemisov atyndaǵy Batys Qazaqstan memlekettik ýnıversıteti «Rýhanı jańǵyrý» ınstıtýtynyń ǵylymı qyzmetkeri, tarıh ǵylymdarynyń magıstri Danııal Tanzenov, «Lamed» evreı etnomádenı qoǵamdyq birlestiginiń tóraǵasy Felıks Baıýkanskıı, Qazaqstan halqy BQO assambleıasy tóraǵasynyń orynbasary, «Vaınah» sheshen-ıngýsh qoǵamdyq birlestiginiń tóraǵasy Danılbek Saratov jáne basqalar aldyńǵy sóıleýshilerdiń sózderin tolyqtaı qoldady.

Sýretter: Rafhat Halelov