BQO ákimi sý tasqynynan zardap shekken saıajaı turǵyndarymen kezdesti
Kezdesý barysynda tabıǵı apat saldarynan kelgen shyǵyndardy óteý mehanızmderine qatysty saýaldar kóterildi.
Oblys ákimi turǵyndarǵa óńirde sý tasqynynan zardap shekken turǵyndar tarapynan týyndaıtyn quqyqtyq máseleler boıynsha arnaıy jedel top jumys isteıtinin jáne turǵyndardyń sol jumys tobyna jeke dara jolyǵyp kómek alýǵa bolatynyn atap ótti.
«Turǵyndardyń ótinishi negizinde oblys boıynsha sý tasqynynan zardap shekken 9 224 otbasyǵa 3,4 mlrd teńge 100 aılyq eseptik kórsetkish kóleminde áleýmettik kómek berildi. Endigi kezekte shyǵyndy esepteý boıynsha komıssııanyń qorytyndysyna sáıkes, 150 AEK kólemindegi tólemder jalǵasýda» — dedi Narıman Tóreǵalıev.
Kezdesý barysynda oblys ákimi saıajaıdaǵy úıleri jalǵyz baspana bolyp tabylatyn turǵyndarǵa zań aıasynda úı beriletinin atap ótti.
Jınalǵandardyń basym kópshiliginiń saıajaıdaǵy úıleri qujat júzinde jaqyn týystaryna rásimdelgen, osyǵan baılanysty, olardyń atynda turǵyn úı bolǵandyqtan ondaı azamattardyń ótinishteri zań sheńberinde jeke-jeke qaralatynyn túsindirdi.
Osylaısha, kezdesýge jınalǵan turǵyndardyń saýaldaryna tıisti jaýaptar berildi.
Atap óterligi, sý tasqynynan zardap shekken turǵyndarǵa quqyqtyq keńes beretin jedel top — Oral qalasyndaǵy Azamattardy qabyldaý ortalyǵynda jumys isteýde (Saraıshyq kóshesi, 47).