BQO ákiminiń jańa orynbasary taǵaıyndaldy (FOTO)
Ony oblys aktıvine tanystyrǵan óńir basshysynyń aıtýynsha, B.O.Azbaev energetıka jáne turǵyn úı-kommýnaldyq sharýashylyq máselelerine basshylyq etetin bolady. Buǵan deıin osy qyzmetti atqarǵan Almaz Badashev óz ótinishine sáıkes jumysynan bosatyldy.
Baǵdat Azbaev 1974 jyly dúnıege kelgen, bilimi joǵary. Ol Qazaq agrarlyq ýnıversıtetin ınjener, Qazaq ekonomıka, qarjy jáne halyqaralyq saýda ýnıversıtetin ekonomıka mamandyǵy boıynsha bitirgen.
JOO-ny bitirgennen keıin óziniń eńbek jolyn «Avtotehobslýjıvanıe» jaýapkershiligi shekteýli seriktestiginde mehanık bolyp bastady. 2001-2013 jyldary Astana qalasynyń kommýnaldyq kásiporyndarynda ártúrli basshylyq qyzmetterdi atqardy, «Astana ormany» memlekettik kommýnaldyq kásiporny dırektorynyń orynbasary retinde qarjy, ekonomıka jáne abattandyrý jumysyna jetekshilik jasady, keıin osy mekemeniń dırektory boldy.
2013-2015 jyldary Qazaqstan Respýblıkasy Aýyl sharýashylyǵy mınıstrligi Orman jáne ańshylyq sharýashylyǵy komıtetiniń tóraǵasy bolyp istedi. B.Azbaevtyń ortalyq memlekettik organdarda, Astananyń kommýnaldyq qyzmetterinde, ekonomıka, qarjy jáne abattandyrý salalarynda is-tájirıbesi bar.