BQO ákiminiń grantyn ıelengen jastardyń deni – bolashaq dárigerler

ORAL. QazAqparat – Batys Qazaqstan oblysynyń ákimi belgilegen joǵary bilim berý grantynyń bıylǵy ıegerleri belgili boldy, dep habarlaıdy QazAqparat tilshisi.

Oblys ákimdigi janyndaǵy joǵary jáne joǵary oqý ornynan keıingi bilimi bar mamandardy daıarlaýǵa memlekettik bilim berý tapsyrysyn ornalastyrý jónindegi konkýrstyq komıssııanyń sheshimimen bıyl 50 jas grant ıegeri atandy.

BQO Bilim basqarmasynan málim etkendeı, 50 jastyń 37-si M.Ospanov atyndaǵy Batys Qazaqstan memlekettik medıtsınalyq ýnıversıtetine tústi.

Dárigerlik mamandyqtarǵa basymdyq berilýi túsinikti. Álemdi jaılaǵan indet kezinde Batys Qazaqstan oblysynda da medıtsına mamandarynyń jetispeýshiligi baıqalyp otyr.

Sonymen qatar 9 jas M.Ótemisov atyndaǵy Batys Qazaqstan ýnıversıtetinde, 4-eýi «Nur-Múbarak» Egıpet ıslam mádenıeti ýnıversıtetinde bilim alatyn bolady.

Basqarma basshysy Aıgúl Myńbaevanyń aıtýynsha, jergilikti bıýdjet esebinen bilim berý granty 2017 jyldan beri berilip keledi.

Mundaǵy maqsat – oblysqa asa qajet mamandardy daıarlaý. Bul jobanyń óz jemisin beretini anyq. Bıyldyń ózinde bir stýdent M.Ótemisov atyndaǵy Batys Qazaqstan ýnıversıtetin támamdap, oblystyq dene shynyqtyrý jáne sport basqarmasynyń qaramaǵyndaǵy mekemege jumysqa ornalasty. Aldaǵy jyly bitiretinder de barshylyq, osylaı jalǵasa beredi.

Stýdentterge stıpendııa tólenedi. JOO bitirgennen keıin úshjaqty kelisimge sáıkes jas mamandar aýyldyq jerge jumysqa jiberiledi.

Bıyl grant ıegerleri atanǵandardyń biri, daryndy balalarǵa arnalǵan mamandandyrylǵan S. Seıfýllın atyndaǵy №11 oblystyq qazaq mektep-ınternat kesheniniń túlegi Janerke Amangeldıeva óziniń qýanyshty ekendigin, jergilikti bıýdjet esebinen M.Ospanov atyndaǵy Batys Qazaqstan memlekettik medıtsınalyq ýnıversıtetinde oqıtynyn jetkizdi.

«Bastapqyda-aq dáriger bolýdy júregimmen qaladym. Degenmen mundaı qurmetti ári óte jaýapty mamandyqty tańdaýǵa júreksinip júrdim. Biraq osydan birneshe jyl buryn ájemiz qatty syrqattanyp qalǵan kezde ákemniń «Tórt qyzym da dáriger bolady» degen sózi qanat bitirip, armanymdy bekite tústi. Sol sátten bastap bul maqsatymnan bas tartqan emespin. Armanym – eń birinshi adamdarǵa kómektesetin izgi nıetti dáriger bolý. Ekinshiden, ólkemizge tanymal Serik Qýandyquly Aqsholaqov tárizdi talaı jannyń ómirine arasha túse alatyn bilikti neırohırýrg atanǵym keledi», - dedi QazAqparat tilshisine Janerke Imantaıqyzy.