BQO ákimi: Tok soqqan balaǵa tıisti kómek kórsetiledi

NUR-SULTAN. QazAqparat – Batys Qazaqstan oblysynda tok soǵyp, eki qolynan aırylǵan balaǵa qatysty tergeý júrip jatyr. Bul týraly óńir ákimi Ǵalı Esqalıev málim etti, dep habarlaıdy QazAqparat tilshisi.

Búgin Ortalyq kommýnıkatsııalar qyzmeti alańynda ótken baspasóz máslıhatynda tilshi Ǵalı Esqalıevke mynadaı saýal qoıdy: «Ótkende BQO-da 5 jasar balany tok uryp, ol 2 qolynan aıyryldy. Osyǵan ózińizdi kináli sanamaısyz ba? Sebebi buǵan deıin sol ashyq jatqan transformatorǵa 5 sıyr tokqa túsip, aram ólipti. Máseleni qoǵam belsendileri de ýaqytyly kótergen. Osy máseleni oblys ákimi retinde nege qadaǵalamadyńyz?»

Óz kezeginde oblys basshysy balanyń jaǵdaıymen jeke baryp tanyspaǵanyn, biraq habardar ekenin aıtty.

«Árıne, ákim retinde men barlyq osyndaı qaıǵyly oqıǵalarǵa jaýaptymyn. Qazir bolǵan jaıtqa qatysty tergeý-tekserý amaldary júrip jatyr. Eger ákimdikke qarasty kompanııanyń kinási dáleldense, árıne tıisti sharany qoldanamyz. Óte ókinishti, qaıǵyly jaǵdaı. Qylmystyq is sotqa jetkennen keıin jaǵdaıdy baqylap, zań aıasynda shara qabyldanatyn bolady. Balaǵa tıisti kómek kórsetemiz. Árıne mundaı jaǵdaı bolmaýy tıis», - dep jaýap berdi Ǵalı Esqalıev.

Eske salsaq, bıyl 25 mamyrda Batys Qazaqstan oblysynda tok soqqan eki balanyń aýrýhanaǵa túskeni týraly habarlaǵan edik.

Óńirlik tótenshe jaǵdaı departamenti taratqan aqparatqa sáıkes 4 bala oınap júrip, kishi stantsııanyń qorshalǵan jabyq aýmaǵyna kirgen. Sol kezde 5 jasar ul balany tok soqqan. Onyń jaǵdaıy aýyr.