BQO ákimi: Sońǵy úsh jylda paıdalanylmaǵan 1 mln astam gektar jer anyqtaldy

ORAL. QazAqparat – Prezıdent tapsyrmasy boıynsha Batys Qazaqstan oblysynda sońǵy úsh jylda 1 mln astam gektar paıdalanylmaıtyn aýyl sharýashylyǵy jerleri anyqtaldy. Bul týraly Memleket basshysynyń Joldaýy aıasynda BQO damýy týraly ótken brıfıngide oblys ákimi Ǵalı Esqalıev málim etti, dep habarlaıdy QazAqparat tilshisi.

Ákimniń aıtýynsha, qazirgi kezde sol jerlerdiń 57 paıyzy ıgerilýde. 16 paıyzy memleketke qaıtaryldy. Al 27 paıyzy boıynsha qaıtarý jumystary júrgizilýde.

Bul jumystar memlekettiń qoldaý sharalarymen qatar oblystyń mal sharýashylyǵyn damytýǵa septigin tıgizýde.

Atap aıtqanda, jyl saıyn mal basy ósip keledi. Mysaly, bıylǵy on aıda iri qara 9,6, jylqy 12,2, qoı men eshki 1,5 paıyzǵa kóbeıdi.

Bıyl úsh bordaqylaý alańy iske qosylyp, óńirdegi bordaqylaý alańdarynyń jalpy syıymdylyǵy 28 myńnan 35 myńnan basqa deıin jetpekshi. Al 2025 jylǵa deıin taǵy da 20 myń basqa arttyrý kózdelýde.

«Óńir ekonomıkasy men aýyl sharýashylyǵynyń odan ári damýy sýǵa táýeldi bolyp otyr. Bıyl Úkimettiń qoldaýy arqasynda óńirdiń ońtústik-batys aýdandary úshin Reseıden jetkiziletin sý kólemi 2019 jylǵydan 2 esege kóbeıtildi. Uzyndyǵy 185,6 shaqyrymdy quraıtyn 3 magıstral kanaldy qaıta jańǵyrtý jumystary bastaldy, bul Jaıyq ózeniniń sol jaq jaǵalaýynda 350 myń gektarǵa deıin jaıylymdy aýyl sharýashylyǵy aınalymyna engizýge múmkindik beredi. Búginde 65 mln tekshe metrge Kırov sý qoımasyn qaıta jańǵyrtý jumystaryn bastadyq, sondaı-aq 40 mln tekshe metrge taǵy 2 sý qoımasyn salýǵa jobalar daıyndalýda. Osy jyly 6 myń gektarǵa deıin sýarmaly jerler engizip, 2026 jylǵa deıin 50 myń gektarǵa deıin jetkizemiz», dedi óńir basshysy.