BQO ákimi shekarada qalyptasqan jaǵdaıǵa baılanysty jıyn ótkizdi

ORAL. QazAqparat – Eń mańyzdy másele – Reseımen shekarada turǵan Qazaqstan azamattaryn elge qaıtarý. Bul týraly oblys ákimdiginde ótken shekara máseleleri jónindegi úılestirý keńesinde BQO ákimi Ǵalı Esqalıev málim etti, dep habarlaıdy QazAqparat tilshisi.

Óńir basshysy Ǵalı Esqalıev Reseı shekara vedomstvosymen birge shekara qyzmeti departamentine qazaqstandyq azamattarǵa kómek kórsetý boıynsha máseleni sheshýdi tapsyrdy.

Sondaı-aq oblys ákimi osy túıtkildi sheshý úshin Qazaqstan Úkimetine usynystar jiberdi, olar jedel túrde qaralýda.

Taǵy bir mańyzdy mindet – BQO aýmaǵynda qalǵan RF azamattaryn esepke alýdy qamtamasyz etý. Oblys ákimi sheteldikterdi qabyldaıtyn azamattar úsh táýlik ishinde polıtsııa organdaryna olardyń kelgeni týraly habarlaýy tıis ekenin atap ótti. Osyǵan oraı oblys ákiminiń orynbasary Baqytjan Narymbetov kóshi-qon qyzmetimen birlesip, batysqazaqstandyqtar men mıgranttardyń quqyqtary men jaýapkershiligine baılanysty túsindirý jumystaryn kúsheıtý, habarlandyrý sanyn ulǵaıtý jáne qajetti aqparaty bar SMS taratýdy uıymdastyrýy qajet.

Zańsyz jalǵa beriletin turǵyn úılerdiń kóptigin eskere otyryp, polıtsııa departamenti memlekettik kirister departamentimen birlesip, osyndaı jalǵa berýshilerdi anyqtaý jáne zańnamaǵa sáıkes sharalar qabyldaýy tıis. Ǵalı Nájimedenuly mundaı azamattarǵa jalǵa berý quqyǵyn resimdeý kúrdeli emes ekenin jáne memlekettik kirister departamenti organdary aıyppul sanktsııalaryn qoldanýdan basqa, osyndaı jalǵa berýshilerdi tirkeýge konsýltatsııalyq kómek kórsetýi tıis ekenin eske saldy. Tsıfrlyq tehnologııalar basqarmasyna qyzmet bazasynda kóshi-qon zańnamasy máselesi boıynsha mıgranttar men jalǵa berýshilerge 109 nómiri boıynsha keńes berýdi uıymdastyrý júkteldi.

Qazirgideı kezde Qazaqstan azamattarynyń da, kóship-qonýshylardyń da qaýipsizdigin qamtamasyz etý asa mańyzdy. Óńir basshysy polıtsııa departamentine jeke quramdy kúsheıtilgen rejımge kóshirýdi, óziniń orynbasary Baqytjan Narymbetovke Batys Qazaqstan oblysy aýmaǵynda qoǵamdyq tártipti qamtamasyz etýge, quqyq buzýshylyqtardyń aldyn alý jáne boldyrmaý maqsatynda qurylǵan halyq jasaqtaryn polıtsııa departamentiniń qaramaǵyna jiberýdi tapsyrdy.

Eske sala keteıik, budan buryn BQO ákimdiginiń Reseımen shekaradaǵy ahýal tolyq baqylaýda ekendigi týraly málim etkenin jazǵan bolatynbyz.