«Bıznestiń jol kartasy» kásipkerlerdiń shaǵyn ǵana bóligin qamtyp otyr
«2016 jylǵy bıýdjettiń oryndalýy qorytyndysyn qarastyra kele Úkimet pen Esep komıtetiniń óte úlken aýqymdy jumys atqarǵanyn atap ótkim keledi. Jyl saıyn Úkimet pen Esep komıtetiniń esebin qarastyrý barysynda memlekettik bıýdjettik oryndalýyndaǵy jekelegen problemalarǵa qatysty jaıttardy kóremiz. Kóp jaǵdaıda bul problemalar júıeli ári bıýdjetti josparlaýmen qatar onyń oryndalý protsessimen de baılanysty. Memlekettik satyp alýlardy buza otyryp qarjyny tıimsiz nemese maqsatsyz paıdalaný, ony der ýaqytynda ótkizbeý, ákimshiler men jergilikti atqarýshy organdardyń naqty is-qımylynyń bolmaýy bıýdjettik monıtorıngtiń utymdylyǵy men tolyqqandylyǵy máselesin kóteredi. Esepterde bıýdjet qarajatyn ıgerýge basa nazar aýdarylǵan. Bul bıýdjet oryndalýynyń shynaıy problemalaryn jasyrady. Igermeý josparlaýdyń sapasy men oryndalýdyń shynaıy qorytyndysy týraly basty tujyrym retinde qarastyrylmaýy tıis», - dedi senator.
Onyń aıtýynsha, ekonomıka ósimi úshin jańa draıverler qajet. sondyqtan qarjy bıýdjettiń árbir teńgesi naqty eseptele otyryp bólinýi tıis. Sondyqtan josparlaýdyń irgeli protsesterin, boljaýdy bastap, jańa ádister engizý kerek.
«Bul eń birinshi kezekte memlekettik damý baǵdarlamalaryna qatysty. Bul jerde nátıjelelik turǵysynan qoldaýdyń sapaly ázirlengen tetikteri qajet. Máselen, «Bıznestiń jol kartasy» 7 jyldyń ishinde aýqymdy bola almady. Tek kásipkerlerdiń shaǵyn bir bóligin ǵana qamtydy. 2010 jyldan bastap júzege asyrylǵan baǵdarlamanyń qatysýshysy 5408 kásipker boldy. Al bul elimizdegi belsendi shaǵyn jáne orta bıznes sýbektileri jalpy sanynyń 0,5 paıyzyn ǵana quraıdy», - dedi D.Káletaev.