Bıznestiń jol kartasy-2025: Semeıde kásipkerlerdiń 741 jobasy qoldaý tapty

SEMEI. QazAqparat – Semeı qalasynda «Bıznestiń jol kartasy-2025» memlekettik baǵdarlamasy aıasynda kásipkerlerdiń 741 jobasyna qoldaý kórsetildi, dep habarlaıdy QazAqparat tilshisi.

Aqparat ortalyǵynda ótken baspasóz máslıhaty barysynda qalalyq Kásipkerler bólimi basshysynyń mindetin atqarýshy Ámına Syzdyqova bıznes ókilderine qandaı kómek kórsetilip jatqanyn aıtyp berdi.

«Bıznestiń jol kartasy-2025» baǵdarlamasy sheńberinde jalpy somasy 14,3 mlrd teńgege 741 jobaǵa qoldaý kórsetildi. Nátıjeli jumyspen qamtýdy jáne jappaı kásipkerlikti damytýdyń «Eńbek» baǵdarlamasy aıasynda kásipkerlerdiń 74 jobasy qoldaý tapty. Osylaısha, 320,5 mln teńge somasynda nesıeler berilgen. Sondaı-aq «Bastaý Bıznes» jobasy boıynsha 168 adam kásipkerlik negizderin oqydy. «Aq nıet» baǵdarlamasy arqyly jalpy somasy 882,3 mln teńgege 66 joba qarjylandyryldy, - dedi ol.

Onyń aıtýynsha, sońǵy bir jylda karantındik shekteýlerge qaramastan Semeıde birqatar iri nysandar iske qosylǵan.

«Et ónimderiniń jartylaı fabrıkattaryn shyǵaratyn «Yqylas-Invest» JShS jobasy júzege asyrylýda. Atalǵan joba jabyq tıptegi mal bordaqylaý alańynyń, qasaphana jáne tushpara tsehynyń keshendi qurylysyn qarastyrady. Búgingi kúni 200 mln teńgeden astam ınvestıtsııa quıyldy. Jobany 2022 jylǵy maýsymda aıaqtaý josparlanyp otyr», - dedi Ámına Syzdyqova.

Sonymen qatar «QAZAQ ASTYQ GROUP» JShS mýltıdaqyldardy óńdeýdiń avtomattandyrylǵan kesheniniń óndirisin iske qosqan. Qazirgi ýaqytta onda 20 myń tonna shamasynda kúnbaǵys maıy óndirilýde.