Bıznestiń problemalaryn jedel sheship, damýyn tejeıtin kedergilerdi anyqtaý kerek - Premer
Qýaty 702 MVt Shúlbi gıdroelektrostantsııasy Shúlbi kentiniń janyndaǵy Ertis ózeninde ornalasqan. Ol qýaty jaǵynan Ertis GES kaskadyndaǵy úshinshi jáne Qazaqstandaǵy eń iri stantsııa bolyp tabylady.
Qazirgi ýaqytta GES-te negizgi jabdyqtyń jaǵdaıyn naqty ýaqyt rejıminde baqylaýǵa jáne aqaýlardy erte kezeńinde anyqtaýǵa múmkindik beretin keńeıtilgen dıagnostıkanyń pılottyq jobasy iske asyrylýda. Joba jospardan tys toqtap qalý jaǵdaılaryn azaıtýǵa jáne stantsııanyń apatsyz jumys isteýin qamtamasyz etýge arnalǵan.
«Stansa basshylyǵy Shúlbi GES-iniń turaqty jumysyn qamtamasyz etý jáne ony jańǵyrtý úshin bar kúshin salýy tıis. Stansanyń qýattylyǵyn arttyrý jónindegi josparlar iske asyra otyryp, jaqsy nátıjelerge umtylý qajet», — dedi Álıhan Smaıylov.
Úkimet basshysynyń nazaryna energetıka jáne sý salasyndaǵy jobalar, sonyń ishinde 3-JEO, Shúlbi GES qýatyn 350 MVt-qa arttyrýǵa múmkindik beretin Ertis ózenindegi kontrrettegish jáne jańa qosalqy stantsııalardyń jobasy usynyldy.
Budan keıin Álıhan Smaıylov jylyna 10 tonnadan astam kontsentrattaǵy altyn óndiretin Jarma aýdanynda ornalasqan Baqyrshyq taý-ken óndirý kásipornynda (Polymetal) boldy.
Munda ornalasqan ken-baıytý fabrıkasynyń jabdyqtary zamanaýı ólsheýish quraldarymen jáne jergilikti avtomatıkamen jabdyqtalǵan. Qazirgi ýaqytta kásiporynda 1500-den astam shtattyq qyzmetker jumys isteıdi.
2022 jyly zaýyt jylyna 2,2 mln tonna ken óńdeı alatyn qýatqa shyqty. Ári qaraı biryńǵaı taý-ken óndirý jáne óńdeý kesheniniń ónimdiligin jylyna 2,4 mln tonnaǵa deıin arttyrý josparlanýda.
«Bıznestiń problemalaryn jedel sheship, onyń damýyn tejeıtin kedergilerdi anyqtaý kerek. Bul salyq salýǵa, keıbir ákimshilik máselelerge, mysaly, ruqsatnama nemese basqa qujattardy berýge qatysty bolýy múmkin. Іskerlik belsendiliktiń artýyn yntalandyrý úshin bul protsesterdi ońtaılandyrý qajet», — dep atap ótti ol.
Sondaı-aq Premer-Mınıstr maı óndiretin «Qazaq Astyq Group» JShS-nyń jumysymen tanysty. Zaýyt táýligine 1000 tonnaǵa jýyq kúnbaǵys tuqymyn nemese 800 tonna raps nemese zyǵyr tuqymyn óńdeı alady. Aldaǵy ýaqytta daıyn ónim ishki naryqqa jáne kórshiles elderge jóneltiledi. Búginde munda tazartylǵan maı shyǵarýǵa múmkindik beretin quny 7 mlrd teńge bolatyn jańǵyrtý jobasy ázirlenýde. Ony júzege asyrýǵa qajetti qarjynyń basym bóligin memlekettik qoldaý tetikteri arqyly tartý josparlanǵan.
Álıhan Smaıylov ákimdikke ishki naryqty negizgi azyq-túlik ónimderimen qamtamasyz etip, eksporttaǵy úlesti arttyryp otyrǵan osyndaı óńdeýshi kásiporyndarǵa belsendi túrde kómek berý kerektigin atap ótti.