Bıznestiń áleýmettik jaýapkershiligi jónindegi «Paryz-2023» baıqaýy bastaldy
Baıqaý halyqtyń ál-aýqatyn odan ári jaqsartý úshin qoǵam aldyndaǵy ózderiniń korporatıvtik áleýmettik jaýapkershiligin qalyptastyrýǵa jáne arttyrýǵa baǵyttalǵan, dep habarlaıdy QazAqparat mınıstrliktiń baspasóz qyzmetine silteme jasap.
Baıqaý eki kezeńnen (óńirlik jáne respýblıkalyq) turady. Shaǵyn, orta jáne iri kásipkerlik sýbektileri 4 atalym («Úzdik áleýmettik jaýapty kásiporyn», «Eńbekti qorǵaý salasyndaǵy úzdik kásiporyn», «Úzdik ujymdyq shart», «Ekologııaǵa qosqan úlesi úshin») boıynsha ózara úzdikti anyqtaıdy. Sondaı-aq baıqaý aıasynda «Jyldyń úzdik áleýmettik jobasy» arnaıy syılyǵy tabystalady.
Baıqaýǵa qatysý tegin. Úmitkerler óz materıaldaryn qaǵaz túrinde jáne elektrondy formatta oblystardyń, respýblıkalyq mańyzy bar qalalardyń jergilikti atqarýshy organdaryna joldaıdy.
Ótkiziletin is-sharalardyń mańyzdylyǵyn eskere otyryp, QR Eńbek jáne halyqty áleýmettik qorǵaý mınıstrligi elimizdiń barlyq kásipkerlerin «Paryz» baıqaýyna belsendi qatysýǵa shaqyrady.
«Baıqaýǵa qatysty ózge aqparatty bilý úshin oblystardyń, Astana, Almaty jáne Shymkent qalalarynyń Jumyspen qamtýdy úılestirý jáne áleýmettik baǵdarlamalar basqarmasyna nemese Eńbek ınspektsııasy jónindegi basqarmasyna, sondaı-aq QR EHÁQM Eńbek qatynastary jáne áleýmettik áriptestik basqarmasyna 8 (7172) 74-35-11 telefony boıynsha habarlasýdy suraımyz»,-delingen habarlamada.