Bıznesti zańsyz tekserýden qalaı qorǵaýǵa bolady

NUR-SULTAN. QazAqparat – QR Bas prokýratýrasynyń Quqyqtyq statıstıka jáne arnaıy esepke alý komıteti jeke kásipkerlerge zańsyz tekserýdiń aldyn alý jóninde keńes berdi. Sondaı-aq, «Qamqor» mobıldi qosymshasy týraly aıtty, dep habarlaıdy QazAqparat.

«2020 jyldyń 1 qańtarynan bastap Qazaqstanda shaǵyn jáne mıkro kásipkerlikti tekserýge 3 jyldyq moratorıı qoldanylady. Bul moratorııge halyqtyń ómiri men densaýlyǵyna, qorshaǵan ortaǵa jappaı qater tóndiretin buzýshylyqtardy boldyrmaýǵa nemese zańdylyqty joıýǵa jáne t.b. negizderge baǵyttalǵan tekserýler kirmeıdi. Mysaly, adamdardyń ýlanýy, órt, jalaqy tólemeý jaǵdaıynda júrgiziletin tekserýler osy moratorııdiń qoldanysyna jatpaıdy. QR Bas prokýratýrasy Quqyqtyq statıstıka jáne arnaıy esepke alý jónindegi komıteti óziniń qadaǵalaý qyzmeti aıasynda osyndaı tekserýlerdiń esebin ǵana júrgizip qoımaı, olardy taǵaıyndaýdyń zańdylyǵyn da tekseredi», - deıdi komıtet .

Taldaý kórsetkendeı, moratorıı jáne qoldanystaǵy karantındik shekteýler 2020 jyly bızneske qatysty tekserýler sanynyń 5 ese tómendeýine yqpal etken. 2019 jyly kásipkerler 128 myń ret tekseristen ótse, 2020 jyly tekserýler sany 27 myńnan asty, bıylǵy 5 aıda 5 myń tekserý bolǵan.

Sonymen qatar, jyl basynan beri shaǵyn jáne mıkro bıznesti tekserýge moratorıı aıasynda komıtet qyzmetkerleri 30-ǵa jýyq zańsyz tekserýlerdiń jolyn kesken.

«Barlyq tekserýlerdi esepke alý men tirkeý protsesi «Tekserý sýbektileri men obektileriniń biryńǵaı tizilimi» (TSOBT) aqparattyq júıesinde tsıfrlandyrylǵan. Júıe eń aldymen bıznesti zańsyz tekserýlerden qorǵaý úshin qurylǵan, ol memlekettik baqylaý men qadaǵalaýdyń ashyqtyǵyn qamtamasyz etedi. TSOBT aıasynda «Qamqor» mobıldi qosymshasy ázirlendi, ol arqyly kásipkerler aldaǵy tekserýler týraly habarlamalardy alady, onlaın rejımde shaǵym bere alady. Qazirgi tańda qosymshany 110 myńnan astam kásipker qoldanady», - dep túsindirdi komıtet.

Eger kásipkerler tekserýshi organ qyzmetkerleri tarapynan zańsyz is-áreketke tap bolsa, Bas prokýratýranyń call-ortalyǵynyń 115 biryńǵaı nómirine habarlasa alady nemese komıtetke jáne onyń aýmaqtyq organdaryna júginýge bolady.

«Sonymen birge, kez kelgen kásipker www.qamqor.gov.kz aqparattyq servısinde tıisti jolǵa akt nómirin engizý arqyly tekserýdiń zańdylyǵyn kóre alady. Sol jerde organnyń ataýy, tekserý kezeńi, tekserýshi tulǵa týraly derekterdi alý arqyly tekserýdiń tirkelgenine kóz jetkizýge bolady. Eger ondaı aqparat bolmasa, tekserý prokýratýra organdarynda tirkelmegen jáne ol zańsyz bolyp tabylady», - deıdi Quqyqtyq statıstıka jáne arnaıy esepke alý komıteti.