Bıznesti qorǵaý: prokýratýra 3,5 myń is boıynsha aıyppuldardyń zańsyz salynǵanyn anyqtady

ASTANA. QazAqparat – Prokýrorlar kásipkerlerdi ákimshilik jaýapqa tartý kezindegi zańbuzýshylyqtardy anyqtady, dep habarlaıdy QazAqparat QR Bas prokýratýrasynyń baspasóz qyzmetine silteme jasap.

Baspasóz qyzmetiniń málimetterine qaraǵanda, bıznesti qorǵaý boıynsha jumys sheńberinde prokýratýra organdary eki aılyq eskirý merziminiń ótýine qaramastan, memlekettik kirister organdary kásipkerlerge Ákimshilik quqyq buzýshylyq týraly kodekstiń (budan ári – ÁQBtK) 92-1 baby (mindetti áleýmettik medıtsınalyq saqtandyrý týraly zańnamany buzý) boıynsha barlyq jerde ákimshilik jaza qoldanǵanyn anyqtady.

Mysaly, Aqmola oblysynyń Bulandy aýdanynda quqyq buzýshylyq jasalǵan kúnnen bastap 4 aıdan keıin JShS ÁQBtK-niń 92-1-babynyń 2-bóligi boıynsha jaýapqa tartylǵan. Orta kásipkerlik sýbektisine 438 myń teńge kóleminde aıyppul salynǵan.

Prokýrorlar barlyǵy 3,5 myń osyndaı isti anyqtady.

Búginge prokýrorlardyń aktileri boıynsha 2,5 myńnan astam aıyppul men eskertý alynyp tastaldy.

Zańsyz salynǵan ákimshilik jazalardy qaıta qaraý jumystary jalǵasýda.

Qazirgi ýaqytta ÁQBtK-niń 92-1-baby boıynsha ákimshilik quqyq buzýshylyq týraly isterdi belgilengen merzimder ótkennen keıin qozǵaý tájirıbesin salyq organdary toqtatty.

Prokýratýranyń sharalary boıynsha jol berilgen buzýshylyqtar úshin birqatar laýazymdy tulǵalar tártiptik jaýapqa tartyldy.