Bıznesti damytýda ákimshilik kedergiler kóp – Serik Jumanǵarın

NUR-SULTAN. QazAqparat – QR Premer-Mınıstriniń orynbasary – Saýda jáne ıntegratsııa mınıstri Serik Jumanǵarın elimizde kásipkerlikpen aınalysýda birqatar problemanyń baryn atap kórsetti, dep habarlaıdy QazAqparat tilshisi.

QR Premer-Mınıstriniń orynbasary – Saýda jáne ıntegratsııa mınıstri Serik Jumanǵarın Almaty oblysynyń Eńbekshiqazaq aýdanynda jumys saparymen boldy.

Sapar barysynda atalǵan óńirdiń agrarlyq kásiporyndaryna baryp, oblys turǵyndary jáne jergilikti kásipkerlermen kezdesti.

«Oblysta jemis baqtary, kókónister, sút ónimderi, shaǵyn jáne iri fermerlik sharýashylyqtar sııaqty agrarlyq bıznes qarqyndy damyp jatqany baıqalady. Árıne, barlyq kásipkerler óndiris jelisin damytýǵa jáne keńeıtýge tyrysady. Olar muny qalaı jasaý kerektigin biledi, ónimniń kólemin arttyrady. Óz ónimderin tıimdi óńdeý jáne saqtaý úshin qolaıly tehnologııalardy engizip jatyr. Kezdesýlerde qoıylǵan suraqtardyń basym bóligi bıýrokratııalyq kidirister, áýre-sarsań, qaǵazbastylyqtyń kóptigimen baılanysty», - dep jazdy Serik Jumanǵarın Facebook paraqshasynda.

Premer-Mınıstrdiń orynbasarynyń aıtýynsha, ınfraqurylymdyq jáne basqa da kompanııalar tarapynan memlekettik qatysý júıesinde keri baılanys joq.

«Mysaly, kásipker jańa tehnologııamen kókónisterdi jyldam tońazytý keshenin saldy. Biraq, barlyq qujattardy jınaǵanyna qaramastan, aılap, jyldap ony magıstraldyq gazben jabdyqtaýǵa qosa almaǵan. Sondaı-aq, onyń jańa tehnologııasy qoldanystaǵy ınvestıtsııalyq sýbsıdııalaý qaǵıdalaryna sáıkes kelmeıdi eken. Basqa fermer analyq mal basyn kóbeıtý úshin agrarlyq nesıe korporatsııasynan 8 aı boıy nesıe ala almaı júr. Úshinshisi sıdr men sharap óndiredi. Eksportqa ónimdi jetkilikti kólemde jetkizýge daıyn, biraq eksporttaýshylarǵa arnalǵan memlekettik qoldaý sharalarynan beıhabar», - deıdi ol.

Sondaı-aq, vıtse-premer jáne saýda mınıstri kásipkerlermen kezdesý barysynda aıtylǵan problemalar men usynystardy quzyrly organdarǵa jetkizýge ýáde berdi.

«Al eksport boıynsha Saýda komıtetine jáne Kaztreıd kásipornyna tapsyrma berdim. Kezdesý barysynda kóterilgen problemalar – qazirgi kedergilerdiń az ǵana bóligi, basym kópshiligi – bıznestiń damýyna kedergi keltiretin ákimshilik kedergiler. Kóp jaǵdaı maǵan málim. Básekelestikti qorǵaý jáne damtyý agenttigi janyndaǵy kedergiler jónindegi keńes alańdarynda kóterilgen. Onyń qatarynda salalyq memlekettik organdar sheship jatqan gazǵa qosylý, jeńildetilgen kredıtter jáne ınvestıtsııalyq sýbsıdııalaý qaǵıdalarynyń básekelestikke qarsy normalaryn alý jónindegi problemalar bar», - dedi S.Jumanǵarın.

Buǵan deıin habarlaǵanymyzdaı elimizde saýda saıasaty tujyrymdamasy ázirlenip jatyr.