Bıznestegi áıelderdiń úlesi qansha

ASTANA. QazAqparat - Qazaqstan Respýblıkasynyń Memlekettik hatshysy Gúlshara Ábdihalyqova Qazaqstanda júrgizilip jatqan genderlik teńdik saıasatynyń jumysy týraly áńgimelep berdi, dep habarlaıdy «QazAqparat» HAA tilshisi.

«Bul másele biz úshin óte mańyzdy ári ol árdaıym kún tártibinde. Sońǵy jyldary birqatar tujyrymdamalyq qujattar qabyldandy. Olardyń ishinde 2006-2016 jyldarǵa arnalǵan genderlik teńdik strategııasy bar. Bul strategııa óz jumysyn aıaqtap, 2030 jylǵa deıingi jańa genderlik damý tujyrymdamasy qabyldandy. EQYU-nyń qoldaýymen biz erler men áıelderdiń teńdigi, turmystyq zorlyq-zombylyqqa qarsy is-qımyl jóninde eki zań qabyldadyq. Bul zańdar jumys istep tur. Ýaqyt talabyna saı olarǵa ózgerister engiziledi», - dedi EQYU ókilderimen kezdesýi kezinde Gúlshara Ábdihalyqova.

Onyń aıtýynsha, búgingi tańda Qazaqstan ekonomıkasyndaǵy áıelderdiń úlesi (ásirese shaǵyn jáne orta bızneste) 50% quraıdy. Parlament Májilisinde bul kórsetkish 27%, máslıhattarda 22%-ten 30% -ke deıin jetken.

«Elde áıelder qoǵamdyq jáne saıası ómirde, ekonomıkada, áleýmettik salalarda jumys isteı alatyndaı jaǵdaı jasalǵan» - dedi Memlekettik hatshy.