Bıznesmenderge kómek qolyn sozǵan ákimderge syılyq taǵaıyndalmaq
16:06, 06 Maýsym 2017
ASTANA. QazAqparat - Óz óńirlerinde qazaqstandyqtarǵa bıznes júrgizýdiń jeńil jaǵdaılaryn jasaǵan ákimderge jyl sońynda arnaıy syılyq taǵaıyndalady, dep habarlaıdy QazAqparat.
Bul týraly búgin QR Ulttyq ekonomıka vıtse-mınıstri Serik Jumanǵarın málim etti.
«Jyl sońynda biz qala men aımaqtardyń bıznes júrgizý jeńildigi boıynsha reıtıngisin jasaımyz. Arnaıy syılyqtar taǵaıyndalady. Syılyqtar Memleket basshysynyń qatysýymen beriledi. Uzaqmerzimdi jumysqa daıyndalý kerek», - dedi vıtse-mınıstr Dúnıejúzilik bank tobynyń «Qazaqstanda bıznes júrgizýdiń sýb-ulttyq reıtıngisi-2017» atty esebin tanystyrý sharasynda.
Jumanǵarınniń aıtýynsha, atalmysh syılyqty taǵaıyndaý barysynda Dúnıejúzilik banktiń bıznes júrgizýdiń sýb-ulttyq reıtıngisi eskeriletin bolady.