Bızneske jaqsy qoldaý kórsetken ákimderdi kótermeleý kerek – Qasym-Jomart Toqaev

ASTANA. QazAqparat – Memleket basshysy Qasym-Jomart Toqaev «Altyn sapa» jáne «Paryz» syılyqtarynyń ıegerlerin marapattaý saltanatynda sóılegen sózinde bızneske tabysty qoldaý kórsetken ákmiderdi kótermeleý qajettigin málim etti, dep habarlaıdy QazAqparat tilshisi.

«Barshańyzǵa málim, kásipkerlerimizge qolaıly jaǵdaı jasaý – tutas memlekettik apparattyń aldynda turǵan mańyzdy mindet. Árıne, zań shyǵarý jumysy elordamyzda júrgiziletini túsinikti. Degenmen, aımaqtardaǵy bıznes ókilderiniń ahýaly jergilikti atqarýshy organdardyń jumysyna, ıaǵnı oblys ákiminen bastap aýyl ákiminiń jumysyna tikeleı baılanysty. Sol sebepti ákimderdi osy talapqa saı baǵalaý kerek. Al úzdik nátıje kórsetkenderdi kótermelep, yntalandyryp otyrý qajet», - dedi Prezıdent.

Sondaı-aq, ol bıyl bıznestiń damýyna aıryqsha úles qosqan óńir ákimdikteri alǵash ret marapattalyp otyrǵanyn atap ótti.

«Búgin biz bıznes júrgizýge asa qolaıly bolǵan aımaqtar men qalalardyń reıtıngi boıynsha arnaıy syılyqtardy saltanatty túrde tapsyramyz. Bul marapat tek statıstıkalyq málimetterdiń nátıjesinde ǵana emes, baǵalaýdyń paıyzy kásipkerlerdiń pikirlerin eskere otyryp jasaldy, tıisti sheshim qabyldandy», - dedi Memleket basshysy.

Aıta keteıik, osynaý saltanatty shara aıasynda úzdik dep tanylǵandarǵa «Qazaqstannyń úzdik taýary», «Qazaqstan Project Management Awards -2022», «TMD boıynsha sapa salasyndaǵy 2021 jyldyń syılyǵy» sııaqty kásipkerlik baǵyttaǵy marapattar da tabystaldy.

Sondaı-aq, «ArýAna», «Bıznes Kemeldilik», «Іsker», «Uly dala eli» syılyqtarynyń jeńimpazdary da marapattaldy.

Bıyl «Altyn sapa» syılyǵyna 281 úmitker ótinim tapsyrǵan. Sarapshylar sonyń ishinen iri, orta jáne shaǵyn bıznes boıynsha 14 bıznes nysanyn 4 atalym negizinde iriktep aldy.