Bızneske zańsyz aralasqan sýdıadar endi 6 jylǵa sottalýy múmkin
«Memlekettik fýnktsııalardy oryndaýǵa ýákilettik berilgen ne oǵan teńestirilgen adamnyń ne laýazymdy adamnyń kásipkerlik qyzmetti júzege asyratyn uıym qurýy ne mundaı uıymdy basqarýǵa zańda belgilengen tyıym salýǵa qaramastan, jeke ózi nemese senim bildirgen adam arqyly qatysýy, eger bul is-áreketter mundaı uıymǵa jeńildikter men artyqshylyqtar berýge nemese ózge de nysandaǵy jaqtaýshylyqqa baılanysty bolsa – múlki tárkilenip, belgili bir laýazymdardy atqarý quqyǵynan ómir boıyna aıyra otyryp, 3 000 AEK-ke (10 350 000 teńgege) deıin aıyppul salýǵa ne sol mólsherde túzeý jumystaryna ne 800 saǵatqa deıingi merzimge qoǵamdyq jumystarǵa tartýǵa ne 3 jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady», - delingen Ashyq NQA portalynda jarııalanǵan kodekstiń jańa redaktsııasynda.
Aıta keteıik, qoldanystaǵy zań talabyna saı, mundaı qylmys jasaǵandarǵa 1 000 AEK kóleminde aıyppul salý, 400 saǵatqa qoǵamdyq jumystarǵa tartý nemese 1 jylǵa sottaý bolmasa osy merzimge bas bostandyǵyn shekteý jazasy qoldanylady.
Sondaı-aq kásipkerlik qyzmetke zańsyz qatysqan quqyq qorǵaý jáne arnaıy memlekettik organdardyń qyzmetkerlerine qatysty jaza da qatańdatylady. Atap aıtqanda, olardyń múlki tárkilenip, ómir boıyna belgili bir laýazymdardy atqarý quqyǵynan aırylady. Buǵan qosa, 4 000 AEK-ke (13 800 000 teńgege) deıin aıyppul salynady ne sol mólsherde túzeý jumystaryna, 1 000 saǵat qoǵamdyq jumystarǵa tartylady. Aýyr jaza retinde 4 jylǵa deıin bas bostandyǵyn shekteý jáne osy sol merzimge sottaý sharalary qoldanylýy múmkin.
Sonymen qatar mundaı qylmys jasaǵan memlekettik laýazymdy tulǵalar da jaýapkershilikten qutylmaıdy. Kináli dep tanylǵandarǵa 5 000 AEK-ke (17 250 000 teńgege) deıin aıyppul salynady, 5 jylǵa sottalady nemese osy merzimge bas bostandyǵy shekteledi.
Al kásipkerlik qyzmetke zańsyz aralasqan sýdıalarǵa múlkin tárkileý, 6000 AEK-ke (20 700 000 teńgege) deıin aıyppul salý, 6 jylǵa sottaý ne bolmasa osyndaı merzimge bas bostandyǵyn shekteý jazasy taǵaıyndalady.
«Kóbinese laýazymdy tulǵalardyń kommertsııalyq kompanııalardy qurýy jáne olardyń qyzmetine qatysýy osy uıymdardyń bıýdjet qarajatyn jymqyrý úshin paıdalanýyna baılanysty. Laýazymdy tulǵalardyń kásipkerlik qyzmetke zańsyz qatysýy tek memlekettik basqarý tártibine ǵana emes, sonymen qatar adal kásipkerlerdiń quqyqtaryna, onyń ishinde erkin básekelestik quqyǵyna da qarsy baǵyttalǵanyn atap ótken jón. Osylaısha, adal kásipkerler memlekettik kelisimshartty alý úshin básekelestik kúreske qatysý múmkindiginen aıyrylady. Kórsetilgen mán-jaılar qylmystyq qyzmettiń osy túrine qarsy is-qımyl jasaýǵa baǵyttalǵan batyl sharalardy, onyń ishinde zańnamalyq sıpattaǵy sharalardy qabyldaýdy talap etedi», - dep túsindirme berilgen ózgeriske.
Qujat 17 shildege deıin kópshilik talqylaýda bolady.