Bızneske túsetin ákimshilik júktemeni azaıtý jumystaryn jalǵastyrý kerek – Álıhan Smaıylov

ASTANA. QazAqparat – Búgin Úkimet otyrysynda Premer-Mınıstr Álıhan Smaıylov kásipkerlikti damytý jónindegi ulttyq joba aıasynda vedomstvolar men ákimdikterge tapsyrma júktedi, dep habarlaıdy QazAqparat tilshisi.

«Ulttyq jobanyń barlyq baǵyttary boıynsha memlekettik qoldaý sharalarynyń tıimdiligin arttyrý qajet. Kásipkerlerden jańa jumys oryndarynyń ashylýyn, turaqty jalaqynyń, zeınetaqy jarnalary men salyqtardyń ýaqytyly tólenýin, shyǵarylatyn ónim túrleriniń kóbeıýin kútemiz», - dedi Á. Smaıylov.

Sonymen qatar ol ákimdikter kásip asham degen azamattarǵa jan-jaqty qoldaý kórsetýi qajet ekenin aıtty.

«Ásirese, kásipkerlik nysandaryna deıin ınfraqurylymdy jetkizip berýge kómektesý kerek. Elektr energııasymen, sýmen, jylýmen qamtamasyz etý, jol salý máseleleri boıynsha jedel sheshim qabyldańyzdar», - dep tapsyrdy Úkimet basshysy.

Budan bólek Premer-Mınıstr Ulttyq ekonomıka mınıstrligi men «Atameken» palatasy bızneske túsetin ákimshilik júktemeni azaıtý jumystaryn jalǵastyrýy tıis ekenin aıtty.

«Bızneske arnalǵan mindetti talaptardy, onyń ishinde jańadan engiziletin talaptardy da qaıta qaraý qajet. Memleket bıznestiń turaqty jáne tabysty qyzmetine múddeli. Kásipkerler osyny naqty sezinýi kerek», - dedi Álıhan Smaıylov.

Foto: primeminister.kz