Bızneske qatysty qylmystyq isterdiń 26%-y negizsiz qozǵalǵan – Ulttyq palata

NUR-SULTAN. QazAqparat – Ulttyq palataǵa kásipkerlerden qylmystyq isterge qatysty shaǵymdar túsip jatyr. Bıznes ókilderi qadaǵalaý jáne quqyq qorǵaý organdarynyń jumysynda áli de jazalaýǵa basymdyq jasalatynyna narazy. Bul týraly «Atameken» UKP basqarma tóraǵasynyń orynbasary Erbol Óstemirov málim etti, dep habarlaıdy QazAqparat.

Ekonomıkalyq qylmystar boıynsha isterdiń 40%-ǵa jýyǵy toqtatylady, al taǵy 26%-y negizsiz qozǵalǵan.

«Osyndaı isterdi tergeý jumystary ádette aılarǵa, jyldarǵa sozylatynyn atap ótken jón. Qylmys quramynyń nemese oqıǵanyń belgileri bolmaǵan kezde de tergeý sharalary júrgiziledi. Osy ýaqyt aralyǵynda kásipkerler úlken shyǵynǵa batady, bıznesi toqtaıdy. Al, «Atameken» UKP mamandary zańnamalyq shekteý saldarynan qylmystyq isterge qol jetkize almaıdy. Sol sebepti, derbes saraptama júrgizýge múmkindigimiz joq», – deıdi Erbol Óstemirov.

«Atameken» UKP derekteri boıynsha, 2021 jyly ekonomıkalyq qyzmet salasyndaǵy qylmystyq quqyq buzýshylyqtar boıynsha 1 707 qylmystyq is tirkelip, tergelgen.

Ákimshilik rásimdik-protsestik kodeks qoldanysqa engizilgen sátten bastap, ıaǵnı bir jyl ishinde sottarǵa 20 031 talap aryz túsipti. Sonyń 6 996-sy bıznes tarapynan. Qaralǵan 2 933 istiń ishinde bıznes paıdasyna 1 458 sheshim shyǵaryldy. Osy oń dınamıkaǵa qaramastan, kásipkerlerge qatysty sottardyń zańsyz sheshimderi shyǵarylyp jatyr.

«Sottardyń sanktsııalary saldarynan eshkim quqyq qorǵaý organdarynyń qatelerin jedel túrde anyqtap, toqtata almaıdy. Qansha kásipker jazalanǵanyn, qansha adamǵa qamaýǵa alý, tergeý, qujattardy suratý, shottardy buǵattaý sııaqty áreketter jasalyp jatyr? Muny da eshkim naqty aıta almaıdy. Sebebi, Qazaqstanda qylmystyq protseske tartylǵan kásipkerlerdiń statıstıkalyq esebi júrgizilmeıdi», – dep tolyqtyrdy Erbol Óstemirov.

Qańtar oqıǵasy men aǵymdaǵy ekonomıkalyq jaǵdaı jumystyń jańa ádisterin tabýdy talap etedi. «Atameken» UKP mamandary quqyq qoldaný jáne sot praktıkasyn turaqty saraptaýǵa, bızneske qysymdy zańnamalyq deńgeıde tómendetý boıynsha sharalar ázirleýge basa nazar aýdarýdy josparlap otyr. Saraptama jáne zańdylyqtyń jaı-kúıin tekserý nátıjeleri toqsan saıyn óńirlik prokýrorlardyń UKP mamandary jáne kásipkerlermen kezdesýlerinde, jartyjylda bir ret Bas prokýror alańynda talqylanady.

Aıta ketsek, búgin Memleket basshysyna Almatyda qańtar oqıǵasynan zardap shekken shaǵyn jáne orta bıznes sýbektileriniń shyǵynyn óteý jóninde bergen tapsyrmalarynyń oryndalý barysy baıandaldy.