Bızneske beriletin grantqa qujat qabyldaý 19 qyrkúıekten bastalady

NUR-SULTAN. QazAqparat – QR Eńbek jáne álemýettik qorǵaý mınıstrligi 19 qyrkúıekte 1,2 mln teńgelik bıznes grantqa qujat qabyldaý bastalatynyn málim etti, dep habarlaıdy QazAqparat tilshisi.

«19 qyrkúıekten bastap Business.enbek.kz portalynda 2021-2025 jyldarǵa arnalǵan kásipkerlikti damytý jónindegi ulttyq joba sheńberinde 4-lek boıynsha jańa bıznes-ıdeıalardy iske asyrý úshin memlekettik granttar alýǵa ótinimder qabyldaý bastalady.

Grant kólemi – 400 aılyq eseptik kórsetkish (1 mln 225 myń 200 teńge). Ár qatysýshy ony bir ret qana alady.

Granttar qarajaty isin jańa bastaǵan kásipkerlerge ózderiniń bıznes-áleýetin ashýǵa, óndiristi jolǵa qoıýǵa jáne damytýǵa, sol arqyly ózin turaqty tabyspen qamtamasyz etýge múmkindik beredi»,-dep jazylǵan vedomstvonyń resmı saıtynda.

Ótinim berý úshin myna áreketter jasaý qajet:

- Portalda tirkelý;

- grant alý sharttaryna sáıkestigine tekserýden ótý;

- bıznes-jospar úlgisin júktep alyp, ony toltyrý jáne portalǵa engizý;

- ótinish nysanyn toltyrý jáne elektrondytsıfrlyq qoltańba kiltimen qol qoıý.

«Internet nemese kompıýter bolmaǵan jaǵdaıda, halyqty jumyspen qamtý ortalyqtarynyń (TsON) ózine-ózi qyzmet kórsetý aımaqtarynda, halyqqa qyzmet kórsetý ortalyqtarynda, kásipkerlerge qyzmet kórsetý ortalyqtarynda ótinim berýge bolady», - dep jazylǵan resmı málimette.

Sondaı-aq, granttan úmitkerler myna talaptarǵa saı kelýi kerek:

- jańa bıznes-ıdeıany iske asyrý;

- tirkelgen jumyssyzdar;

- jeke kásipker retinde tirkelgenine 3 jyl tolmaǵandar;

- biryńǵaı jıyntyq tólemdi tóleýshiler.

Úmitker myna áleýmettik sanattardyń birine jatýy shart:

- múgedektigi bar adamdar;

- qoldanystaǵy «kandas» mártebesi bar adamdar;

- ońtústik óńirlerden soltústik óńirlerge qonys aýdarýshylar

- az qamtylǵan otbasy músheleri;

- kópbalaly otbasy múshesi (jubaıy / zaıyby);

- múgedektigi bar balany tárbıelep otyrǵan adam (jubaıy / zaıyby);

- asyraýshysynan aıyrylý boıynsha járdemaqy alýshylar;

- jastar.

Sonymen qatar úmitkerdiń «Bastaý Bıznes» jobasy boıynsha kásipkerlik negizderine oqytý týraly 3 jyldan aspaıtyn merzimge sertıfıkaty bolýǵa tıis.

«Granttar berýdiń búkil protsesi elektrondyq formatqa aýystyryldy. Grant alýǵa ótinimderdi qabyldaý biryńǵaı tereze – «Business.enbek.kz» portaly arqyly júzege asyrylady»,-dep jazylǵan.

ıAǵnı, ótinishti qaǵaz kúıinde berý múmkin emes.

Atalǵan 1,2 mln teńgeniń grantyn qajetti qural-saımandar, eńbek quraldaryn, tehnologııalyq jabdyqtar, mal, kásipke qajet janýardy, qus, kóshet, tuqym satyp alýǵa, bıznes júrgizetin oryn-jaıdy jalǵa alý aqysyn tóleýge jumsaýǵa bolady.

Al turmystyq maqsatqa, burynǵy nesıeni jabýǵa, jyljymaıtyn turǵyn úı satyp alýǵa jáne salýǵa, jer telimin satyp alýǵa, aktsızdeletin ónimder óndirýge berilmeıdi.

Grant taǵaıyndaý sheshimin halyqty jumyspen qamtý ortalyqtary aýdandyq/qalalyq komıssııanyń uıǵarymy negizinde shyǵarady.