Bızneske arnalǵan 1,5 mln teńge grantqa ótinim qashan qabyldana bastaıdy

<p>ASTANA. KAZINFORM &mdash; 15 shildeden bastap Business.enbek.kz portalynda 2-lek boıynsha jańa bıznes-ıdeıalardy iske asyrý úshin granttar alýǵa ótinim qabyldana bastaıdy. Respýblıka boıynsha ekinshi lekte 4 655 adamǵa grant berý josparlanyp otyr.&nbsp;</p>

Grant qaıtarymsyz negizde beriledi, nysanaly maqsaty - jańa bıznesti bastaý jáne damytý. 

Grant kólemi - 400 AEK (1 476 800 teńge). Ár qatysýshy ony tek bir ret ala alady.

Grant qarajaty isin jańa bastaǵan kásipkerlerge ózderiniń bıznes-áleýetin ashýǵa, óndiristi jolǵa qoıýǵa jáne damytýǵa, sol arqyly ózin turaqty tabyspen qamtamasyz etýge múmkindik beredi.

Ótinim berý úshin:

— Portalda tirkelý;

— grant alý sharttaryna sáıkestigine tekserýden ótý;

— bıznes-jospar úlgisin júktep alyp, ony toltyrý jáne portalǵa engizý;

— ótinish nysanyn toltyrý jáne ETsQ kiltimen qol qoıý qajet.

Internet nemese kompıýter bolmaǵan jaǵdaıda, mansap ortalyqtarynyń ózine-ózi qyzmet kórsetý aımaqtarynda, halyqqa qyzmet kórsetý ortalyqtarynda ótinim berýge bolady.

Grant alý úshin birqatar sharttardy saqtaý qajet.

Jańa bıznes-ıdeıany iske asyrýǵa grantty kimder ala alady:

— tirkelgen jumyssyzdar;

— jeke kásipkerler (tirkeý merzimi 3 jylǵa deıin).

Bul rette úmitker tómendegi áleýmettik sanattardyń birinen bolý kerek:

— múgedektigi bar adamdar;

— qoldanystaǵy «kandas» mártebesi bar adamdar;

— óńiraralyq qonys aýdarýshylar

— az qamtylǵan otbasy músheleri;

— kópbalaly otbasy múshesi (jubaıy / zaıyby);

— múgedektigi bar balany tárbıelep otyrǵan adam (jubaıy / zaıyby);

— asyraýshysynan aıyrylý boıynsha járdemaqy alýshylar.

Úmitkerdiń «Bastaý Bıznes» jobasy boıynsha kásipkerlik negizderine oqytý týraly 3 jyldan aspaıtyn merzimge sertıfıkaty bolýy tıis.

Rásimderdiń ashyqtyǵyn qamtamasyz etý, adamı faktordy azaıtý, ótinish berýshilerge yńǵaıly bolý úshin granttar berýdiń búkil protsesi elektrondyq formatqa aýystyryldy. Grant alýǵa ótinimderdi qabyldaý biryńǵaı tereze — «Business.enbek.kz» portaly arqyly júzege asyrylady.

Grantty: qajetti qural-saımandardy, eńbek quraldaryn, tehnologııalyq jabdyqtardy, maldardy, janýarlardy, qustardy, kóshetterdi, butalardy, tuqymdardy satyp alýǵa, oryn-jaılardy jalǵa alý aqysyn tóleýge alýǵa bolady.

Granttar: tutynýshylyq maqsattarǵa, kredıttik qaryzdardy óteýge, jyljymaıtyn turǵyn úı satyp alýǵa jáne salýǵa, jer ýchaskelerin satyp alýǵa, aktsızdeletin ónimder óndirýge berilmeıdi.

Granttardy Eńbek mobıldiligi ortalyqtary grant alýǵa úmitkerlerdiń ótinishterin qaraý jónindegi aýdandyq/qalalyq komıssııanyń sheshimi negizinde beredi.

Úmitkerler óz bıznes-jobasyn komıssııa otyrystarynda tanystyrady. Bul rette komıssııanyń árbir múshesi bıznes-jospardy baǵalaıdy jáne baǵalaý paraǵyn mynadaı ólshemsharttar boıynsha toltyrady: bıznes-ıdeıanyń básekege qabilettiligi, ótkizý naryqtarynyń pysyqtalýy, bıznes-jobanyń qarjylyq ómirsheńdigi, kásipkerlik daǵdylardyń deńgeıi, jańa jumys oryndaryn qurý.

Osylaısha, grant berý týraly sheshim komıssııalyq túrde jáne úmitkerlerdiń bıznes-jobalarynyń pysyqtalýyn baǵalaýdyń naqty ólshemsharttary negizinde qabyldanady.

Komıssııa sheshimi úmitkerdiń Portaldaǵy jeke kabınetine jiberiledi.

Komıssııanyń oń sheshimi bolǵan jaǵdaıda úmitker bank derektemelerin usynady, shartqa qol qoıady jáne odan ári toqsan saıyn qarajattyń paıdalanylýy týraly esep beredi.

Munyń bári Eńbek mobıldiligi ortalyqtary men onyń fılıaldaryna (mansap ortalyqtaryna) barmaı-aq, elektrondyq formatta jasalady.