Bıznes halyqtyń problemasynan alshaqtamaýy tıis – Nurtas Adambaı

NUR-SULTAN. QazAqparat – Qazaqstandyq tanymal prodıýser, rejısser Nurtas Adambaı qıyn-qystaý zamanda iri bıznes ókilderi halyq problemasynan alshaqtamaǵany jón degen pikir bildirdi, dep habarlaıdy QazAqparat tilshisi.

«Memleket ázirge sheshim qabyldap, qarapaıym halyq aýrýmen, ómirmen kúresip jatqanda mıllıardtaǵan aqshasy bar bıznesmender, onyń ishinde «Forbs»-qa kiretin aýqatty jandar jaǵdaıdy syrttan baqylap otyrmaýy tıis. Olar osy qazaq jeri men eliniń arqasynda óz mıllıardtaryn taýyp, jetistikke jetti. Dál osy sát - baı-qýatty jandardyń adamgershiligi men meıirimin kórsetýge jaqsy múmkindik. Múmkin men qarabaıyr dúnıeni aıtyp turǵan shyǵarmyn, degenmen olar mıllıardtaǵan aqshalaryn ómir boıy jumsap bitire almaıtyny belgili. Osyndaı qıyn sátte nege qolushyn sozbasqa? Bıznes halyqtyń problemasynan alshaqtamaýy tıis. Aıtpaǵym, iri bıznestiń ókilderi azamattarǵa qolǵabys tıgizse eken deımin. Bárin aıtpaǵannyń ózinde bir ǵana baı adam jaǵdaıymen búkil máseleni sheshe alar edi», - dedi Nurtas Adambaı QR Sybaılas jemqorlyqqa qarsy qyzmetiniń uıymdastyrýymen ótken onlaın máslıhatynda.

Belgili óner juldyzynyń aıtýynsha, jeke áleýmettik paraqshasyndaǵy bıznestiń jaýapkershiligi týraly jazbasynan keıin, oǵan nıetti adamdar qolushyn sozý maqsatynda habarlasqan.

«Maǵan jeke áleýmettik paraqsham arqyly nemese jazbalarymnyń astyna pikir retinde kóptegen azamattar kómek surap jazady. Bireýi dári-dármek surasa, ekinshisi azyq-túliktiń joqtyǵyn aıtady. Osy oraıda jaqyn tanys, joldastarymmen birlesip muqtaj jandarǵa medıtsınalyq quraldar men qajettilikterdi satyp alyp berý josparymyzda bar. Qazirgi tańda sony uıymdastyrý jumystarymen aınalysýdamyz», - deıdi ol.