Bizdiń tarapymyzdan daýys berý barysyna esh syn-eskertpe joq - qyrǵyz baıqaýshysy

ASTANA. QazAqparat - Qyrǵyzstandyq baıqaýshylar tarapynan Qazaqstanda ótip jatqan saılaýǵa qatysty esh syn-eskertpe joq. Bul týraly búgin Qyrǵyzstan Respýblıkasy Ortalyq saılaý jáne referendýmdar ótkizý komıssııasynyń múshesi Rashıd Bekbasarov aıtty.

«Búgin biz birneshe saılaý ýchaskesinde bolyp, óte jaqsy áserde qaldyq. Meni tańǵy saǵat 7.00-de saılaý ýchaskeleri ashylǵan sátten bastap daýys berýshilerdiń legi kóp bolǵandyǵy tań qaldyrdy. Máselen, Nazarbaev ýnıversıtetindegi saılaý ýchaskesinde nebári 50 mınýttyń ishinde 400 adam kelip óz daýysyn berdi», - dedi ol

Onyń atap ótýinshe, saılaýshylar óte belsendi, saılaý shtattyq rejimde ótip jatyr. Barlyq ýchaskeler jaqsy daıyndalǵan, aqparattyq qoldaý da sáıkesinshe ornalastyrylǵan.

«Saılaý protsesine qatysýshylarǵa arnalǵan ádistemeler men jadynamalar da óte joǵary sapada daıyndalǵan. Saılaýǵa daıyndyq sharalardyń óte baıypty júrgizilgendigi kórinip tur. Bizdiń tarapymyzdan daýys berý barysynna esh syn-eskertpe joq. Merekelik kóńil kúı anyq baıqalady», - dedi R.Bekbasarov.