Bizdiń myqty IT-mamandarymyzdy sheteldikter 3-4 kýrstan alyp ketip jatyr - mınıstr

NUR-SULTAN. QazAqparat – Qazaqstandaǵy bilikti IT-kadrlardy sheteldegi alpaýyt kompanııalar ózderine tartyp jatyr. Bul týraly QR Ǵylym jáne joǵary bilim mınıstri Saıasat Nurbek aıtty, dep habarlaıdy QazAqparat tilshisi.

«IT-kadrlardy neǵurlym myqty etip daıarlasaq, soǵurlym olardy shetelge tartyp alady. Jalpy, barsha álemde bul mamandarǵa suranys joǵary bolyp tur», - dedi S. Nurbek elordada ótip jatqan «Adamı kapıtal - Jańa Qazaqstan damýynyń negizgi resýrsy» forýmynda.

Onyń aıtýynsha, aldaǵy 3-4 jylda elimiz naryǵyna kerek 100 myń IT-mamandy daıarlaý kerek.

«Bizdiń myqty degen IT-mamandarymyzdy sheteldikter 3-4 kýrstan alyp ketip jatyr. Olardy ózimizde ustap qalý ońaı emes. Bilikti mamandar álemdik alpaýyt kompanııalarda jumys isteýge talpynady. Olardyń qarjylandyrýy jastardy tartýǵa baǵyttalǵan. Úndistannyń, Qytaıdyń kadrlaryn ózderine tartyp jatyr. Sondyqtan biz de osy úrdiske túsip qaldyq», - dedi mınıstr.

Budan buryn habarlanǵandaı, Saıasat Nurbek aldaǵy 6-7 jylda Qazaqstanda stýdentter sany 1 mln-ǵa jetip qalatynyn aıtty.