«Bizdiń komanda jaraly jolbarys sekildi» - baspasózge sholý
***
«Egemen Qazaqstan» basylymy búgingi sanynda jasóspirimder arasyndaǵy ózine-ózi qol jumsaý oqıǵalarynyń artýyna qatysty «Ómirden túńilme, jas óren!» atty maqala jarııalandy.
«Qostanaı oblysynda 2016 jyldyń alǵashqy tórt aıynda 10 jasóspirim ómirimen qosh aıtysýǵa bel býǵan. Onyń 8-i tiri qalyp, ekeýi kóz jumdy. Al ótken 2015 jyly 38 bala sýıtsıdke barǵan. Onyń 23 jasóspirim óz ómirin qııýǵa oqtalǵanymen, áýpirimmen tiri qalǵan. 15-i ózine qol jumsady. Qazan urmaı, qar jaýmaı solǵan gúldeı qulaǵan osy jasóspirimderdiń eń kishkentaıy 12 jastaǵy qyz bala, er balalardyń eń kishisi 14-te ǵana. Ózine qol jumsaǵan on bestiń tórteýi qyz, 11-i ul», - dep jazady basylym.
***
Balalarǵa arnalǵan kitaptan taǵy da kemshilik tabyldy, dep jazady «Aıqyn» basylymy búgingi sanynda jarııalanǵan «Bul qandaı sanamaq?» atty maqalasynda.
«Qýyr-qýyr qýyrmash...» saamaqtar kitapshasyndaǵy saýsaqtar oıynynyń mátini, onyń mán-maǵynasyna qarasańyz balany jaqsylyqqa tárbıeleýge emes, ury-qarlyqqa alyp baratyndaı.
«Qarańyz:
«Saýsaqtar oıyny». Balanyń qolyn alyp, bas barmaǵyn ustap:
- Urlyq jasaımyz ba? - deıdi.
Suq qolyn ustap:
- Jasasaq jasaıyq.
Ortan qolyn ustap:
- Qudaıdan qoryqpaısyńdar ma?
Aty joq qolyn ustap:
- Qudaı ne qylar deısiń.
Shynashaǵyn ustap:
- Alaıyq ta qashaıyq,
- Urlaıyq ta soıaıyq, - deıdi.
Bul - úıindegi balalary úshin satyp alǵan tanysymnyń qolyna tıgeni. Negizi bul «Bes saýsaq nege birdeı emes?» degen qıssa bolýy tıis. Biraq sanamaqta ne úshin urlyq jasaıtyny, odan shyǵatyn qorytyndy qandaı ekendigi aıtylmaǵan», - delingen materıalda. - Búldirshinderge arnalǵan kitaptyń sıqy osyndaı bolsa, erteńgi urpaǵymyzdyń ury nemese Qudaıdy moıyndamaıtyn ateıst bolyp shyqpasyna kim kepil? Aıtqanyńdy tikeleı qabyldaıtyn bala «urlyq jasaıyq, Qudaı ne qylar deısiń» degendi durys dep túsinse, kimge renjımiz?! Máselen, bul qıssany bir ata-ana bilse, ekinshisi bilmeýi de ǵajap emes. Osyny kóre sala, ata-ana balalardyń oı-órisin damytý úshin satyp alǵan kitapshany tyǵyp qoıǵanyn aıtady».
Sonymen qatar «Aıqyn» gazeti Rıodaǵy eń basty úmitterimizdiń biri bolǵan, biraq jaqynda dopıng qoldandy degen aıyppen jarystan shettetilgen aýyr atletterimizge qatysty «Bizdiń komanda jaraly jolbarys sekildi» atty maqala arnap otyr.
«Eki aptadan keıin alaýy tutanatyn Rıo Olımpıadasyndaǵy Qazaqstannyń basty «qarýy» aýyr atletter edi. Londondaǵy dodada elimizdiń ánuranyn tórt márte shyrqatyp, aıdy aspanǵa bir-aq shyǵarǵan otandastarymyzdyń bul joly da abyroıymyzdy asqaqtatyp, mártebemizdi bıiktetetinine eshkimniń de kúmáni bolǵan joq. Biraq sporttyq saıystardy saıası oıynǵa aınaldyrýdy kózdegen keıbir dókeıler san mıllıon jankúıerdiń úkili úmitin aıaqqa taptady», - dep bastalady maqala.
«Eki aptadan keıin Olımpıada alaýy tutanady. Al sol jarysta kimderge senim artamyz? Aýyr atletıkadan Qazaqstan quramasy sapynda jeńis tuǵyryna kóterilýge kúsh-jigeri jetetin kimder bar?», - degen saýal tastaǵan materıal avtory «baıyptap qarasaq, qazirgi qurama da osal emes» ekendigin alǵa tartady.
***
Bıyl Ońtústik Qazaqstan oblysynan Soltústik óńirge qonys aýdarýǵa 800-den astam otbasy qujat tapsyrǵan. Bul týraly «Túrkistan» basylymy jazýda.
«Qazir bul otbasylarmen suhbat júrip jatyr. Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Ásııa Temirbaevanyń aıtýynsha, soltústikke kóshkisi keletin azamattardyń mamandyǵy anyqtalyp, olardyń túıindemeleri jumys berýshilerge jiberilýde. «Jumyspen qamtý-2020» baǵdarlamasy arqyly jumyspen, baspanamen qamtylady. Soltústik oblysynyń basshylyǵy mamandyǵy sol jaqta suranysqa ıe, qonystanýǵa múmkindigi bar 300-deı otbasyny qabyldap, baspanamen qamtýǵa daıyn», - deıdi oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Ásııa Temirbaeva. Basqarma ókilderi bergen málimette ońtústikten kóship barǵandar negizinen aýyldyq jerlerde turatyny aıtylǵan. Sebebi agrarly ólkeden barǵandar aýyl sharýashylyǵy jumystaryn damyta alady», - delingen «Kúngeıden baǵyt alǵan kósh - saýatty kóshi-qon saıasaty bastaldy» atty maqalada.
Soltústiktiń sharýa qojalyqtarynda da mamandar qajet kórinedi. Onda jaıylym jerler óte kóp bolǵandyqtan mal sharýashylyǵyn damytýǵa óte ońtaıly. «Ol jaqtaǵy jumystardyń basym bóligi aýyl sharýashylyǵyna qatysty. Sondaı-aq tehnıkalyq mamandyq ıelerine degen suranys kóp. Qazirdiń ózinde Maqtaaral, Saıram. Saryaǵash aýdandarynan azamattar qonys aýdarýǵa qujattaryn tapsyryp jatyr», - deıdi oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy.
***
Soltústik Qazaqstanda sibir jarasynan mertikken iri qara maldyń ólikteri jerlengen aýmaqtar qorshaýǵa alynbaq, dep habarlaıdy «Ekspress K» baslymy. Bul maqsattarǵa bıýdjetten 25 mıllıon teńge bólinip otyr.
«Oblystyq veterınarııa basqarmasynyń jetekshisi Erbatyr Madııarovtyń sózi boıynsha, SQO-da ólik jerlengen 161 jer bar. Ol jerlerdiń koordınattary kadastrǵa qaıta engizildi. Ol jerlerge «Baıqańyzdar! Sibir jarasy!» degen eskertý ornatylǵan. Barlyq jerde qorshaýlar bar, biraq keıbir tustary qur qadalarmen oqshaýlanǵan. Jergilikti ańshylar, balyqshylar, malshylar olardy otqa jaǵady», - delingen «Sprıach za vysokım zaborom zarazý» atty materıalda.