Bizdi Atyraýdyń ekologııalyq jaǵdaıy alańdatady – Maǵzum Myrzaǵalıev

ATYRAÝ. QazAqparat – Búgin QR Ekologııa, geologııa jáne tabıǵı resýrstar mınıstri Maǵzum Myrzaǵalıev Atyraýda jergilikti ÚEU ókilderimen, ekobelsendilermen kezdesti, dep habarlaıdy QazAqparat.

Mınıstr kezdesýde óńir ekologııasyn jaqsartýǵa baılanysty belgilengen josparlardy tıimdi iske asyrý úshin birlesken jumysty kúsheıtýdiń mańyzyna toqtaldy.

«Bizdi aımaqtaǵy ekologııalyq jaǵdaı alańdatady. Atyraý elimizdiń eń lastanǵan qalalarynyń qataryna kiredi. Árıne, bul jaǵdaıdy jaqsartý qajet. Bul mańyzdy jumysta belsendi azamattar tarapynan qoldaý, kómek qajet. Men qashanda syndarly dıalogqa ashyqpyn», - dedi mınıstr.

Maǵzum Myrzaǵalıev Atyraý oblysynyń ekologııalyq problemalaryn sheshý úshin 40 is-sharadan turatyn Jol kartasy ázirlengenin atap ótti. Olardyń qatarynda jańa kárizdik tazartý keshenderin salý jáne eskilerin qalpyna keltirý, «Sasyq saı» jáne «Sharshy» býlaný alańdaryn rekýltıvatsııalaý, Oral ózeniniń basseınin kógaldandyrý, tazartý, saýyqtyrý jáne basqa da mańyzdy is-sharalar bar.

«Biz Atyraýdyń ekologtarymen, qoǵam ókilderimen birneshe ret kezdestik.

Kezdesýlerimizdiń nátıjesi – Jol kartasyn qabyldaý. Jańa Ekologııalyq kodeks te osy baǵytta perspektıvaly múmkindikter ashatynyn atap ótkim keledi. Eń mańyzdysy, kodeks iri lastaýshy kásiporyndardyń áleýmettik jaýapkershiligin arttyrýǵa múmkindik beredi», -dedi Maǵzum Myrzaǵalıev.

Onyń aıtýynsha, qazirdiń ózinde 1-sanatqa jatatyn kásiporyndar eń ozyq qoljetimdi tehnologııalardy engizý boıynsha daıyndyq sharalaryn júrgizýdi bastady. Demek, bolashaqta atmosferaǵa lastaýshy zattardyń shyǵaryndylary aıtarlyqtaı azaıady.

Sondaı-aq, mınıstr Atyraýda óńirdiń ekologııalyq problemalaryn tirkeıtin front-ofıs ashýdy usyndy.

Eske sala ketelik, budan buryn Atyraýda Ekologııa kodeks talqylanǵanyn habarlaǵan bolatynbyz.