#Bizbirgemiz:Túrkistan oblysynda azyq-túlik baǵasy turaqtala bastady

TÚRKІSTAN. QazAqparat - Elimizde tótenshe jaǵdaıǵa baılanysty qolǵa alynǵan respýblıkalyq #Bizbirgemiz aktsııasyn túrkistandyq kásipkerler qoldap, turmysy tómen otbasylarǵa kómek kórsetýde. Sondaı-aq óńirde baǵany ustap turýdyń keshendi sharalary óz nátıjesin bere bastady, dep habarlaıdy QazAqparat tilshisi.

Máselen Keles aýdanynyń ortalyǵy Abaı aýylynda áleýmettik dúken ashylyp, ondaǵy bir qap un baǵasy 6500 teńgeden satylýda. Al, bir keli kartop 80 teńgeden jáne pııaz 95 teńgeden saýdalanýda. Igi is Nur Otan partııasy Keles aýdandyq fılıaly men aýdandyq kásipkerlik bóliminiń uıytqy bolýymen júzege asyrylýda. «Áýes» jaýapkershiligi shekteýli seriktestiginiń demeýshiligimen aýdanda az qamtylǵan asa muqtaj 75 otbasyna 1 qap unnan berilip, 1000 dana tegin betperdeler taratyldy.

Aıta ketý kerek, elimizde tótenshe jaǵdaı engizilgen kúnnen bastap aýdandaǵy 300-den astam kópbalaly jáne turmysy tómen otbasylaryna kómek kórsetilgen. Bul januıalarǵa azyq-túlik, un jáne 6 myńnan astam tegin betperdeler úlestirilgen.