#BizBirgemiz: Qazaqstandyq kásipkerler koronavırýspen kúreske qarajat bólip jatyr

NUR-SULTAN. QazAqparat – Elbasy bastamasymen qurylǵan «Birgemiz» qoǵamdyq qoryna elimizdiń barlyq óńirinen qaıyrymdylyq retinde qarajat túsip jatyr, dep habarlaıdy QazAqparat.

Bul týraly QR Tuńǵysh Prezıdentiniń baspasóz hatshysy Aıdos Úkibaı Tvıtterge jazdy.

«Kóptegen dáýletti qazaqstandyqtar koronavırýspen kúreske qarajat aýdaryp jatyr. Nursultan Nazarbaevtyń bul usynysy otandyq metsenattar men iri kásipkerlerdiń qoldaýyna ıe boldy», - dedi A. Úkibaı.

Onyń aıtýynsha, bul – jalpy qaýip-qater jaǵdaıynda qoǵamnyń, memleket pen bıznestiń shoǵyrlana alýynyń aıqyn dáleli.

«Qazaqstandyqtar kezekti ret ózderiniń birligi men qaısarlyǵyn, jaqynyna kómektesýge jáne qıyndyqtardy birge jeńýge daıyn ekendigin kórsetti», - dep atap ótti Aıdos Úkibaı.

Jınalǵan qarajat Memlekettik komıssııanyń usynystaryna sáıkes jumsalady.

«Qoǵamdyq qorǵa metsenattar men kásipkerler – Tımýr Qulybaevtan 10 mıllıon dollar, Aıdyn Rahymbaevtan - 2 mıllıon dollar, Keńes Raqyshevten - 1 mıllıon dollar, Ǵalymjan Esenovten - 2 mıllıon dollar, Rashıd Sársenovten - 2 mıllıon dollar, Aleksandr Klebanovtan - 2 mıllıon dollar jáne Aleksandr Belovıchten – 2 mıllıon dollar qaıyrymdylyq kómek tústi», - dep habarlady A. Úkibaı.

Qazirgi ýaqytta qoǵamdyq qorǵa 41 mıllıon dollar qarajat jınaldy.

Koronavırýstyq ınfektsııamen kúresti qoldaýǵa qarajat jınaý jalǵasýda.

Qoǵamdyq qor rekvızıtteri:

Alýshy: «Birgemiz» qoǵamdyq qory

Alýshy banki: Nur-Sultan qalasyndaǵy «ForteBank» AQ fılıaly

KZT aǵymdyq shoty (IBAN schet): KZ0896503F0009566181

USD aǵymdyq shoty (IBAN schet): KZ5196503F0009566183

BSN/JSN: 200340023803